Mapa munisípiu Viqueque. Imajen/Espesiál

VIQUEQUE, 12 novenbru 2021 (TATOLI)—Relasiona ho komemorasaun loron 12 novembru ba dala-XXX, komunidade no juventude postu Uatulari, munisípiu Viqueque, halo marsa hodi refleta akontesementu Masakre Santa Cruz.

“Ohin, ami sobreviente hamutuk ho juventude sira realiza atividade marsa hodi hanoin hikas akontesementu Masakre Santa Cruz no memoria uluk,” Prezidente Komisaun Organizadora ba komemorasaun 12 novembru, Manuel Pinto, hateten ba Agência TATOLI, iha resintu postu Administrativu Uatulari, sesta ne’e.

Notísia relevante: Loron Nasionál Juventude, populasaun Uatulari halo marsa

Tuir Responsável ba atividade ne’e, marsa ne’e hodi fanun filafali espíritu joven sira momentu partisipa iha asaun pasífika iha tinan-30 liubá, ne’ebé joven agora tenke baniti tuir ain-fatin rezisténsia ninia.

Rute marsa ne’e, hosi parokia to’o baliza aldeia Mau-selok to’o aldeia Mau-kiak, tama ba uma mahon restu mortál iha postu administrativu Uatulari, ho distánsia maizumenus metru 300-resin.

“Hanesan ohin tama fali morru administrasaun, ami sente fila akontesimentu 12 novenbru 1991,” nia akresenta.

Iha fatin hanesan, Administradór Uatulari, Manuel do Rosário, konsidera, marsa ne’e reflete tebes ba akontesimentu Masakre Santa Cruz.

“Ida-ne’e, bele fanun joven sira agora hodi banati tuir asaun momentu rezisténsia,” nia subliña.

Atividade marsa ne’e hahú tuku 9:00 to’o tuku 10:30 dadeer, to’o uma mahon restu mortál Uatulari.

Durante marsa, joven sira lori bandeira nasionál, bandeira Organização da Juventude dos Estudantes de Timor-Leste (OJETIL) no banner sira, hodi hakilar viva ‘Juventude Loriku Asuwa’in’.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here