Manifestante 12 Novembru 1991 ne’ebé sai vítima iha Masakre Santa Cruz ne’ebé militár Indonézia detein iha Semitériu Santa Cruz nia laran. Imajen/Espesiál.

DILI, 12 novembru 2021 (TATOLI)- Vigáriu Pároku Igreja Motael, Padre Nelson da Costa Freitas, hateten, juventude loriku asuwa’in ho aten-brani no respeita malu ne’ebé nakonu espíritu patriotizmu hodi fó aan ba mate atu lori naroman ukun-rasik an liuhosi masakre 12 novembru 1991.

“Juventude loriku asuwa’in uluk brani no respeitu dór, maibé juventude ohin loron latauk ema ida, militár no polísia mós la respeita tanba morál no devosaun menus. Nune’e husu ba juventude-sira atu banati tuir éroi 12 novembru hodi respeita ita-nia ukun-na’in sira,”, Padre Nelson da Costa Freitas, hateten, bainhira preside mis aba selebrasaun Masakre Santa Cruz ba dala-30, iha Igreja Motael, sesta ne’e.

Padre relembra, uluk juvnetude loriku Asuwa’in berani duni, tanba laiha arma no kroa’t ruma, maibé sé nia-peitu hasoru kilat to’o kanek no lakon vida hodi atinje naroman ukun rasik mai iha “terra do sol nascente”.

“Juventude loriku Asuwa’in simu ordem husi rai laran, rai li’úr, polítik na’in sira, ita brani duni hakilar iha momentu ne’ebá, maski laiha forsa no ita hotu neon murak maibé ita-nia fiar, ita-nia espíritu patriotizmu hakarak ita-nia rain ne’e tenke hetan independénsia,” Amu fó hanoin.

Hodi hatutan, “independensia ne’e hotu-hotu nia esforsu liuhosi frente Armada, diplomata, klandestina, Igreja katólika to’o loriku Asuwa’in ne’ebé lori lapijeira, kadernu, tersu no lori imajen haklalak kontra rezime ne’ebé estraga ita-nia povu, la respeitu ema-nia dignidade, kontra direitu umanu,”.

Tanba ne’e,  nia husu ema hotu-hotu atu imita hahalok di’ak juvnetude loriku asuwa’in ne’ebé uluk luta ba ukun rasik aan la sura sira-nia kolen, maibé sira de’it loron bainhira loos mak Timor bele uku naan.

Padre ne’e husu ba Governu atu tenke luta ba moris di’ak povu nian liuliu haree juventude Juventude loriku asuwa’in barak sei moris mukit.

“Agora ita selebra ona tinan 30, maibé ita tinan 30 ne’e sobrevivente balun mós sei moris iha mukit nia laran,” Amu triste.

Iha misa selebrasaun ne’e partisipa hosi Membru Governu balun, autoridade militár no seguransa, família mate restu 12 novembru, estudante, joven-sira no populasaun.

 Hafoin misa ramata, halo kedas marsa ka prosisaun ho rute hahú hosi Igreja Motael to’o simetériu Santa Cruz-Balide.

Notisia Relevante: Loron 12 novembru nu’udar reflesaun ba foin-sa’e iha era independénsia

Jornalista :  Antónia Gusmão

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here