Koordenadór Konsellu Veteranu RAEOA, Jeferino da Cruz Salu. Imajen Tatoli/Abílio Elo Nini.

OÉ-CUSSE, 12 novembru 2021 (TATOLI) — Konsellu Veteranu Rejiaun Administrativa Espesiál Oé-Cusse Ambeno (RAEOA), Jeferino da Cruz Salu, relembra iha prosesu luta libertasaun nasionál papél igreja Katólika maka sai mahon hodi defende direitu umanu juventude sira.

“Prosesu luta libertasaun nasionál Timor-Leste nian dezde i 1975 to’o 1999, papél igreja Katólika importante iha prosesu luta ba ukun-rasik-an, tanba igreja katólika iha inisíu kedas nia papél maka defende direitu umanu, tanba defende sarani sira hosi hahalok brutalizmu ne’ebé kolonializmu halo ba ita, iha akontesimentu masakre Santa Kruz joven barak halai subar iha igreja,” Koordenadór Konsellu Veteranu RAEOA, Jeferino da Cruz Salu, ko’alia iha kalan reflesaun iha salaun SJRO, Oé-Cusse, kinta ne’e.

Nia fó ezemplu, komemorasaun loron masakre Santa Kruz, inisiasaun prosesu ida ne’e juventude sira konsentra iha igreja Motael, ida-ne’e signifíka, katak igreja Katólika nia mahon iha-ne’ebé de’it.

Tanba tuir nia, iha tempu ne’eba to’o 1999, igreja barak mak hetan estragu, padre barak hetan baku, torturasaun, mate, madre no frater barak mate, sarani barak mós mate, tanba defende ukun-an.

“Bainhira inimigu hahú okupa Timor-Leste, informasaun hotu-hotu ita simu mai no sai ba liur liuhosi igreja Katólika, padre sira maka ba-mai, entaun ita-nia gerilleiru sira hasai mensajen ba mundu liuhosi padre sira, hodi akompaña ita-nia prosesu ne’e to’o hetan rezultadu,” nia katak.

“Ita ukun-an ona, foinsa’e sira presiza lé istória barak, atu labele ema mai bosok ita, papél juventude futuru nasaun nian, tenki kaer-metin ita-nia istória,” veteran ne’e fó hanoin.

Jornlista           : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here