Jogador Karketu Dili FC hadau bola hosi Aitana FC iha abertura jodu Primeiru Divizaun LFTL, iha Estádiu Munisipál Dili, sesta (12/11). Imajen/ média LFTL

DILI, 12 novembru 2021 (TATOLI)– Jogadór médiu hosi Karketu Dili FC, Gaudencio Monteiro (14), susesu lori Karketu Dili FC manán Aitana FC ho golu úniku iha jogu abertura Primeira Divizaun Liga Futeból Timor -Leste époka 2021.

Jogu abertura ne’ebé hala’o iha Estádiu Munisipál Dili, sesta loraik ne’e, Karketu konsege lidera provizóriu tabela kualifikasaun ho pontu tolu.

Iha jogu primeira parte ekipa rua lansa kedan kontra no atake ba malu tuir tékniku no abilidade ida-idak nian atu buka gaña pontu tolu.

Iha kampu kuadradu ne’e nia laran, ekipa rua  hala’o jogu bonito tanba iha tribun leten parte lorosa’e no loro monu  nakonu ho adeptu ekipa rua nian.

Aitana iha ambisaun makas, maibé ladun fó presaun ba Karketu tanba defeza Karketu, Norberto Gonçalves (13), Angiso Barbosa (16) no Domingos Ramos hanesan moru metin ba avansadu Aitana Edit Savio (9) no Fransyatma Keffi.  Maski sutu dala haat mak Edit Savio lansa, rua guarda rede Karketu Franky (20) konsege salva no rua la kona iha alvu.

Enkuantu, Karketu nian avansadu Gelbanio Alberto (10), Boateng Appiah (7) ho kolega sira lansa barak mak la kona iha alvu no barak salva hosi guarda rede Aitana Yusak Redjauw (30).

Aitana hala’o jogu ho karakter defensivu no sempre troka ba ofensivu tuir ritmu jogu iha kampu klaran tanba área klaran Aitana nian ladun iha jogadór médiu ne’ebé bele fahe bola ho di’ak no defeza ladun antisipa bola makas. Enkuantu Karketu hala’o jogu ho ofensivu lansa bola long atu buka golu, la konsege.

Nune’e,  to’o minutu 45 termina no deskansa minutu 15 hafoin kontinua ba segunda parte laiha ekipa ida mak hatama golu no rezultadu mantein 0-0.

Jogadór Karketu Dili FC selebra golu, bainhira hatama hosi jogadór Gaudencio Monteiro. Imajen/ média LFTL

Hakur ba segunda parte ekipa rua nafatin hatudu jogu ne’ebé di’ak, maibé sorte monu liu-ba Karketu nia liman tanba iha minutu 79, jogadór Gaudencio Monteiro uza kedan oportunidade hatama golu ida ba Aitana muda skore ba 1-0.

Golu ne’e hanesan golu ikus ba ekipa rua tanba  to’o minutu 90 ramata laiha tan golu ruma mak akontese, nune’e vitória hela ba karketu ne’ebé provizóriu lidera tabela klasifikasaun ho pontu tolu.

Jogu ne’e dirije hosi árbitru Pedro Maia, juiz liña Antonio de Carvalho, Filomeno da Silva no árbitru rezerva Romario Tety.

Komposizaun jogadór

Eskuad Aitana: Yusak Redjauw (30) baliza, Yosef Koyami (55) defeza, Gabriel da Cosita (14) defeza, Roberto Maia (40) defeza, Lamberto Ximenes (23) defeza, Gilson dos Reis (10) médiu, Rigellbert Lay (7) médiu, Edit Savio (9) avansadu, Fransyatma Keffi (21) avansadu, Jose Pereira (13) médiu no Rivaldo Coreia (12) médiu.

Suplente: Celestino da Costa (20) baliza, Jaimito Soares (15) defeza, Francelino Belo (22) defeza, Osvaldo Freitas (77) defeza, Alexandre Nougera (33) defeza, Miguel Ximenes (19) avansadu no no Miguel de Araujo (11) avansadu.

Eskuad Karketu: Franky (20) baliza, Norberto Gonçalves (13) defeza, Antonio Profirio (23) defeza, Domingos Ramos (5) defeza, Angiso Barbosa (16) defeza, Gaudencio Monteiro (14) médiu, Silvestre Gama (21) médiu, Nataniel Reis (8) médiu, Gelvanio Alberto (10) avansadu, José Guterres (24) defeza no Buateng Appiah (7) avansadu.

Suplente: João Ximenes (1) baliza, Zenio Soriano (3) defeza, Antonio Martins (2) defeza, Januario Fonseca (17) defeza, Valerino Boa Ventura (15) defeza, Celso Escurial (15) avansadu no Salvador Taequi (27) avansadu.

Notisia Relevante: Aitana prontu kontra Karketu iha abertura primeira divizaun LFTL

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here