Diretór Servisu Edukasaun Munisípiu Baucau, Augosto Hornai Ximenes. Imajen TATOLI/Natalino Belo.

BAUCAU, 11 novembru 2021 (TATOLI) – Servisu Edukasaun Munisípiu Baucau realiza enkontru téknika ba preparasaun ezame nasionál ne’ebé tuir kalendariu sei realiza iha loron 13 dezembru tinan-ne’e.

Diretór Servisu Edukasaun Munisípiu Baucau, Augosto Hornai Ximenes, hateten enkontru refere ko’alia kona-ba prekupasaun diresaun no eskola sira iha ezame prenximentu kadernedeta inklui aula adisionál ba estudante sira.

“Enkontru ohin atu halo preparasaun tékniku ba ezame nasionál no lokál, nasionál fixa ona kalendáriu fixu sei realiza iha loron 13-15 dezembru no sei kontinua kedas ezame lokál iha loron 16 to’o 18 dezembru,” Diretor Edukasaun Baucau ne’e koa’lia iha Vila Nova, kinta ne’e.

Ministériu Edukasaun Juventude no Desportu (MEJD) deside elabora pontu ezame tuir kurríkulu maibé ba Baucau grau difikuldade ezame mak redu tanba antes ne’e atividade aprendizajen suspende bainhira inplementa serka sanitária no konfinamentu obrigatóriu.

“Munisípiu lima MEJD deside modelu B tanba sofre suspensaun ba prosesu aprendizajen tanba estadu emerjénsia, serka sanitária no konfinamentu obrigatóriu,” nia akresenta.

Maske nune’e, edukasaun munisipál kontinua oreinta atu eskola hotu kontinua distrubui matéria inklui matrix ka tópiku no sub-tópiku iha ezame, manuál rezumu ba estudante sira atu prepara di’ak liután iha ezame nasionál.

Fatin ezame nasionál iha Munisípiu Baucau kategoria tolu hanesan ensinu báziku hamutuk 29, ensinu sekundária hamutuk 15 no ensinu téknika vokasionál hamutuk haat.

Totál estudante ne’ebé atu tuir ezame nasionál hosi nível ensinu báziku hamutuk 3.328, ensinu sekundária 2.093 kompostu siénsia teknolojia hamutuk 1.138 no siénsia sosiál umanidade 955 no ensinu tékniku vokasionál hamutuk estudante 286.

“Estudante hirak-ne’e mak verifika ikus depois ezame períodu daruak, sira-ne’e mak naran tama ona iha sistema unidade kurríkulu nasionál atu tuir ezame,” Augosto hateten.

Jornalista         :Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here