Partisipante Interkambiu joven produtivu sira iha munisípiu Bobonaro. Imagen Tatoli/Sérgio da Cruz.

BOBONARO, 11 novembru 2021 (TATOLI) — Cruz Vermelha Timor-Leste (CVTL) Filiál Bobonaro, realiza interkámbiu juventude produtivu (JUPRO) ba dahaat iha área Utedai, aldeia Raifun vila, suku Raifun, postu administrativu Maliana, munisípiu Bobonaro ho tema ‘Hamutuk ho Cruz Vermelha hakmaan sofrementu umana’.

Ofisiál Juventude CVTL Nasionál, Sonia dos Santos Ramalho, informa atividade ne’e realiza atu promove juventude Cruz Vermela nia kreativada inovativa, hodi luta hakmaan sofrementu komunidade sira-ne’ebe hasoru durante ne’e, liuliu períodu pandemia Covid-19. 

Ofisiál Juventude CVTL Nasionál, Sonia dos Santos Ramalho, Imajen Tatoli/Sérgio da Cruz.

“Atividade sempre realiza kada tinan rua ne’ebé mak envolve mós área internasional sira, maibé tamba tinan ida ne’e ho sofrementu tristeza hanesan moras mundiál Covid-19, atividade realiza iha idak-idak nia filiál, tanba iha komunidade barak mak seidauk hatene juventude Cruz Vermela nia aktividade sira,” Sonia ko’alia iha Utedai, kinta ne’e.

Nia esplika, atividade iterkámbiu ne’e troka hanoin kona-ba matéria primeiru sokorru, ijiéne sanitasaun, joven saudável, saúde reprodutiva no lideransa.

“Ha’u esperu ho atividade sira-ne’e bele halo mudansa ba joven sira atu nune’e sira bele iha hanoin ne’ebé produtivu liután,” nia katak. 

CVTL Filial Bobonaro halo abertura interkámbiu Juventude produtiva ba dahaat iha Bobonaro, (11/11). Imajen Tatoli/Sérgio da Cruz.

Entretantu Delegadu Juventude CVTL Filiál Bobonaro, Elisio Gomes, enkoraja partisipante sira atu sai joventude ne’ebe produtivu iha aspetu edukasaun, saúde, ekonomia, lideransa no seluk hodi bele halo mudansa iha sosiedade no kontribui ba dezenvolvimentu nasaun nian.

“Ita boot sira mak hanesan futuru ba nasaun, ita boot sira mak sai hanesan riin ba iha ponte ida hodi ema ultrapasa ba iha estrada sorin, entaun agora ita sira tenke preparadu, labele hein ita-nia lideransa sira tanba sira katuas ona,” nia fó hanoin.

Nune’e mós Gil Martins nu’udar estudante, orgullu tanba bele hetan oportunidade partisipa iha atividade interkámbiu ne’e nune’e hasa’e abilidade atu sai ajente transformadór. 

Estudante EBC Númeru 1 Maliana, Gil Martins. Imajen Tatoli/Sérgio da Cruz.

“Ha’u sei aplika iha eskola no iha uma, atu nune’e joventude sira bele unidade, sé ita mak la kaer malu metin sé mak haree ita tanba ita mesak Timoroan de’it, entaun ita hansan joven labele uza arte-marsiál halo inimigu ba malu,” nia fó  hanoin.

Entretantu partisipante ne’ebé partisipa iha interkambiu durante loron rua ne’e mai hosi Estudante EBC Númeru 1 Maliana, Cristal, Eskola Café Maliana, Eskola Téknika Moleana no Uniaun Eskuteiru Timor-leste (UNE-TL) no voluntáriu CVTL nian.

Enkuantu Aktividade ne’e realiza tanba hetan apoia fundu hosi Sekretaria Estadu Juventude no Desportu (SEJD) ho Montante $25.000,00, ne’ebé aloka ba kada Filiál CVTL nian entre $1.500,00 to’o $1.600.00 iha munisípiu hotu.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here