Edifísiu UNPAZ iha Ai-mutin. Imajen/UNPAZ

DILI, 11 novembru 2021 (TATOLI)—Universidade da Paz (UNPAZ) iha estudante hamutuk 9.176 mak sai benefisáriu ba programa Governu hanesan izensaun propina.

Tuir Reitór UNPAZ, Adolmando Amaral, antes ne’e parte universidade submete ona relatóriu no lista foun ba implementasaun programa faze dahuluk ba Ministériu Ensinu Superiór, Siénsia no Kultura (MESSK), maibé parte ministériu fó filafali hodi prienxe tuir formatu no formuláriu foun ne’ebé prepara ona.

“Ami-nia relatóriu propina submete ona ba Ministériu Ensinu Superiór Siénsia no Kultura, maibé ministériu fó fali formatu foun, entaun ami foti fali relatóriu sira ne’ebé submete ona hodi prienxe tuir fali formatu foun,” Reitór dehan iha kampus UNPAZ, Ai-mutin, kinta ne’e.

Notísia relevante: MESSK hein relatóriu universidade molok realiza izensaun propina semestre daruak

Nune’e, parte universidade halo ezersísiu boot tanba tenke bolu fali estudante ida-idak atu mai asina tuir sira-nia naran.

“Daudaun ne’e sei falta estudante 100- resin mak seidauk asina tanba seidauk fila hosi ferias,” nia akresenta.

MESSK fó tempu ba universidade hodi kumpre rekezitu to’o loron 15 novembru, ne’ebé iha loron determina ona, tenke submete lista sira ba ministériu.

“Tanba ne’e, universidade halo esforsu atu husu estudante sira prienxe lalais lista sira atu submete ba ministériu,” nia tenik.

Nune’e mós, ba subsídiu ba pulsa internet, Reitór adolmando hateten, hosi inísiu pulsa tama, maibé agora nia halo konfirmasaun fali ho estudante, konfirma katak pulsa la tama ona.

“Ami la preokupa ona ho pulsa tanba ami la hala’o ona atividade aprendizajen online ba estudante sira,” nia subliña.

Iha sorin seluk, Reitór Universidade Nasionál Timor Lorosa’e (UNTL), João Soares Martins, hateten, parte universidade manda ona relatóriu inzensaun propina faze dahuluk ba MESSK, ne’ebé akumula estudante hamutuk 3.870.

“Agora hein de’it lista faze daruak nian, ne’ebé iha tempu besik sei submete tan,” nia akresenta.

Tuir diploma ministeriál númeru 34/2021 19 maiu, kona-ba prosedimentu inzensaun pagamentu propina hosi parte estudante ensinu Superiór nasionál, mensiona kada estudante benefisiáriu sei hetan izensaun propina $150 ba semestre ida ho prosedimentu ba estudante ne’ebé regularmente inskritu ka ativu iha tinan letivu 2021, iha kursu titulár lisensa, iha instituisaun ensinu superiór públika no privada akreditada, enkuantu ba estudante ne’ebé hetan ona bolsa estudu sei la sai benefisiáriu programa ne’e.

Aleinde ne’e, instituisaun ensinu Superiór ne’ebé sai befisiáriu ba programa tenke reembolsa ba estudante inskritu, valór propina to’o montante másimu $150.

Antes ne’e, Ministériu Finansa (MF) realiza ona pagamentu izensaun propina ba estudante ensinu superiór ho totál pagamentu millaun $5,6, liuhosi transferénsia ba konta bankária universidade públika no privada akreditada hamutuk 18, ne’ebé reembolsa direta ba pagamentu propina estudante hamutuk 64.619.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here