Diretór Ezekutivu ANAAA, Edmundo da Silva Viegas. Imajen TATOLI/Egas Cristóvão

DILI, 11 novembru 2021 (TATOLI)—Komisaun G Parlamentu Nasionál (PN) ne’ebé trata asuntu Edukasaun, Juventude, Kultura no Sidadania, halo audiénsia públika ho Ajénsia Nasionál Avaliasaun Akreditasaun Akadémiku (ANAAA), hodi diskute kona-ba alokasaun orsamentu iha Orsamentu Jerál Estadu (OJE) 2022.

Ajénsia ne’e prevee orsamentu $371.426 iha tinan 2022, kompostu hosi saláriu no vensimentu ho totál $5.318, bens no servisu $363.098, kapitál menór, kapitál dezenvolvimentu no transferénsia públika laiha.

“Orsamentu ne’e atu realiza planu avaliasaun programatiku no avaliasaun institusionál iha instituisaun sira ne’ebé eziste,” Diretór Ezekutivu ANAAA, Edmundo Viegas, hateten iha resintu Parlamentu nasionál, kinta ne’e.

Notísia relevante: ANAAA husu adisionál $290.000 iha KROP

Avaliasaun programatiku no avaliasaun institusionál ne’ebé ANAAA sei realiza iha tinan 2022 ne’e atu reforsa liután programa sira ne’ebé maka realiza ona.

“Programa avaliasaun ne’e trasa ona iha programa prioridade, atu aselera boa governasaun, jestaun institusionál no edukasaun formasaun ba instituisaun ensinu superiór sira,” nia akresenta.

Entretantu orsamentu ne’ebé ANAAA tau iha proposta antes ne’e $500.000 maibé orsamentu hetan korte maka’as kuaze metade.

“ANAAA konsege hamosu proposta adisionál, ne’ebé hetan aprovasaun orsamentu $100.000, nune’e totál orsamentu ne’ebé prevee ba tinan oin hamutuk $371.426,” nia dehan.

ANAAA ezekuta ona $237.718 hosi OJE 2021

Alokasaun orsamentu ANAAA iha tinan 2021 hamutuk $426.865, kompostu hosi saláriu no vensimentu $5.021, bens no servisu $355.207, kapitál menór $66.637, kapitál dezenvolvimentu no transferénsia públika laiha.

Nune’e, to’o loron 09 novembru 2021 ezekuta ona $237.718, ne’ebé reprezenta 56% hosi totál alokasaun.

“Ami iha esperansa sei ezekuta tan to’o 30% resin. Ami hein katak tinan ne’e reamata bele atinje ezekusaun to’o 92%,” Diretór Ezekutivu ANAAA dehan.

Ajénsia ne’e iha ambisaun, hosi loron 10 to’o 21 dezembru, ezekusaun tenke aumenta 30% tan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here