Prezidente Repúblika, Francisco Guterres Lú Olo. Imajen/Mídia PR.

DILI, 11 novembru 2021 (TATOLI)—Prezidente Repúblika, Francisco Guterres Lú Olo, kinta ne’e simu karta kredensiál virtualmente hosi Embaixadór Estraordináriu no Plenipotensiáriu hosi Nasaun 20.

Prezidente Repúblika, Francisco Guterres Lú Olo fó benvindu no agradese ba Embaixadór sira hosi Nasaun 20 ne’ebé hato’o karta kredensiál.

“Ha’u simu imi-nia karta kredensiál ne’ebé hato’o agora. Lori ha’u-nia naran rasik no povu Repúblika Demokrátika Timor-Leste nia naran manifesta ami-nia onra no gratidaun kle’an ba exelénsia sira. Iha momentu solene ne’e, ha’u hakarak hateten maske iha pandemia COVID-19 nia laran, fizikamente ita hamutuk, ita hamutuk nafatin. Aktu ida-ne’e revela ita-nia país rua hamutuk nafatin,” Xefe Estadu ne’e hateten liuhosi komunikadu imprensa ne’ebé Agência Tatoli asesu, kinta ne’e.

Embaixadór sira la’ós rezidénsia hosi Nasaun 20 loke nia embaixada iha Singapura, Indonézia no Austrália simu knaar nu’udar reprezentante diplomátiku nasaun ida-idak nian ba Timor-Leste.

Bainhira país ida-idak ultrapasa pandemia COVID-19 no movimentasaun transporte normaliza, Embaixadór ida-idak bele hala’o reuniaun bilaterál ho Prezidente Repúblika no Governu Timor-Leste.

Entretantu, Prezidente Repúblika simu karta kredensiál hosi Embaixadór Estraordináriu no Plenipotensiáriu hosi Israel, Sagi Karni, Repúblika Popular Bangladesh MD Tauhedul Islam, Reinu Dinamarka Lars Bo Larsen, Repúblika Azerbaijão Jalal Sabir Oglu Mirzayev, Ordem Malta Terence Kevin Tobin, Repúblika Popular Argélia Merzak Belhimeur, Repúblika Federal Alemanha Ina Ruth Luise Lepel, Roménia Dan Adrian Balanescu, Repúblika Argentina Gustavo Arturo Torres.

Repúblika Guiné Bissau António Serifo Embaló, Reinu Kamboja IV Heang, Repúblika Checa Jaroslav Dolecek, Repúblika Italiana Benedetto Lateri, Katar Fawziya Edrees Salman Al-Sulaiti, Repúblika Demokrátika Popular Laos Phomma Sidsena, Repúblika Colombia Juan Camilo Valencia Gonzales, Repúblika Chipre Martha Mayrommatis, Repúblika Mosambique Belimoro José Malate, Repúblika Federal Nigeria Usman Ari Ogah no Repúblika Islámika Paquistão Muhammad Hassan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here