DILI, 11 novembru 2021 (TATOLI)—Vise-Sekretáriu Jerál Organizasaun Juventude no Estudu Timor Lorosa’e (OJETIL), Liurai Tasi, enkoraja joven sira atu badinas estuda hodi kontribui ba dezenvolvimentu iha Timor-Leste.
Liurai Tasi hateten lia hirak ne’e iha ámbitu komemorasaun tinan-30 Loron Masakre Santa Cruz no tinan-16 Loron Nasionál ba Juventude iha loron 12 novembru.
“Ha’u hakarak fó hanoin ba joven sira iha Timór laran tomak, ne’ebé moris hafoin akontese masakre 12 novembru 1991, labele hanoin buka problema maibé halo tuir lisaun ne’ebé joven sira uluk kuda ona hanesan hanoin ida de’it, luta ba indepedénsia. Agora tempu ba joven sira, ho ispíritu ida de’it hanoin dezenvolvimentu ba rai ida-ne’e ho di’ak,” Vise-Sekretáriu hateten ba Agência TATOLI, via telefónika, kinta ne’e.
Notísia relevante: Masakre Santa Cruz hanesan lisaun ida ba jerasaun foun sira
Nia dehan, iha tempu ukun-an ona mak joven sira hanoin hela de’it problema, maka sei la dezenvolve nasaun ho di’ak tanba luta ne’ebé joven sira uluk halo la haree ba loromonu no lorosa’e, maibé ida de’it hodi luta kontra inimigu.
“Tempu to’o ona ba joven atu hamriik no kontinua luta na’in sira-nia mehi ne’ebé hakarak harii dame iha nasaun , labele halo ran fakar tan iha rai ne’e nia leten, maibé tenke lori nasaun ba oin ho matenek,” nia hameno.
Joven uluk, hahú hosi 1974-1999 buat hotu limitasaun ba sira tanba iha inimigu nia liman, maibé espíritu aten brani mak halo sira habadak funu.
“Ita hotu hatene akontesimentu Masakre 12 novembru, maski la to’o oras 24 maibé ema sira ne’ebé tuir manifestasaun ne’e serbisu antes ona mak tuir orientasaun ba halo manifestasaun, ne’ebé la to’o oras 24 maibé nia impaktu ne’e muda mundu nia hanoin no loke matan, hodi apoiu ita-nia luta sai badak hodi hetan indepedénsia,” nia hateten.
Tanba ne’e, relasiona ho preokupasaun ne’ebé dehan sobrevivente 12 novembru luta la to’o 24 oras maibé hetan subsídiu, tuir Liurai Tasi, ida-ne’e direitu sobrevivente sira atu hetan tanba liuhosi manifestasaun ne’e mak hasai Timór nia lutu metan.
“Ita-nia lei kona-ba Estatutu Kombatente Libertasaun Nasionál, ba sobrevivente sira atu hetan subsídiu, hahú hosi 1974-1999 ne’e altera ona atu sobrevivente sira hetan subsídiu,” Liurai Tasi hateten.
Biban ne’e, nia husu ba sobrevivente sira ne’ebé karik daudaun seidauk rejistu, tenke rejistu tanba kontribuisaun ne’e kiik maibé fó impaktu boot ba Timor-Leste nia di’ak.
“Governu autoriza hahú hosi tinan 2003, sobrevivente 12 novembru hotu tenke rejistu no hetan sira-nia direitu, tanba ne’e husu ba sobrevivente balun ne’ebé to’o agora seidauk rejistu, tenke rejistu atu nune’e bele hetan direitu, tanba daudaun ne’e sira ne’ebé rejistu ona hetan direitu hanesan, medalla Loriku asuwa’in, tanba ne’e tenke rejistu hotu nune’e ba direitu seluk mós hotu-hotu tenke hetan,” Vise-Sekretáriu OJETIL dehan.
Jornalista : Arminda Fonseca
Editora : Julia Chatarina
