Atividade sensibilizasaun iha Eskola Sekundáriu Xabika Besi Kulit, kinta (11/11). Imajen TATOLI/Vitorino Lopes da Costa

VIQUEQUE, 11 novenbru 2021 (TATOLI)–Organizasaun Naun Govermentál (ONG) K’nua Haberan Komunidade (KHK) Viqueque kolabora ho Servisu Saúde munisipál, sensibiliza vasina Pfizer no kaben sedu ba estudante sira hosi Eskola Sekundáriu Xabika Besi Kulit, iha postu administrativu Uatulari, munisípiu Viqueque.

Tuir Koodenadór Programa Protesaun KHC, Marito da Silva, atividade ne’e ho objetivu atu hasa’e koñesimentu estudante sira.

“Dala barak rona rumoris oi-oin kona-ba vasina no mós kaben sedu, ne’ebé ita haree estudante barak maka kaben sedu. Tanba ne’e, ita fó sensibilizasaun,” Koodenadór programa hateten ba Agência TATOLI, iha Eskola Sekundáriu Xabika Besi Kulit, Uatulari, kinta ne’e.

Atividade ne’e realiza durante loron-ida no partisipa hosi totál estudante hamutuk na’in 200-resin.

Programa ne’e hetan apoia fundu hosi Caritas Austrália hamutuk $28.000 hodi realiza atividade iha eskola sira iha munisípiu Viqueque.

Iha fatin hanesan, Diretór Eskola Sekundáriu Xabika Besi Kulit, Adelino Xavier, agradese ba KHC ne’ebé partilla ona informasaun importante ba estudante sira.

“Ha’u agradese tebes ba organizasaun KHC no saúde postu Uatulari tanba mai halo diseminasaun kona-ba saúde, liuliu ba prevensaun COVID-19 no kaben sedu. Tanba ne’e, ha’u husu estudante sira tenke tau atensaun másinu hodi komprieende buat ruma,” nia hameno.

Eskola Sekundáriu ne’e prepara ona lista estudante hodi simu vasina.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here