Koordenadór Konsellu Veteranu RAEOA, Jeferino da Cruz Salu. Imajen Tatoli/Abílio Elo Nini.

OÉ-CUSSE, 11 novembru 2021 (TATOLI) — Koordenadór Konsellu Veteranu Rejiaun Administrativa Espesiál Oé-Cusse Ambeno (RAEOA), Jeferino da Cruz Salu, apela ba joven sira kaer-metin prinsípiu kultura promove unidade nasionál.

Tema ne’ebé konsellu veteranu uza iha semináriu komemorasaun loron juventude nasionál no Masakre Santa Kruz 12 Novembru, maka “Papél veteranu ba espíritu patriotizmu no nasionálizmu hanesan inspirasaun ba jerasaun ohin no futuru”.

“Papél juventude xave atu promove unidade nasionál maka juventude tenke kaer-metin prinsípiu kultura Timor-oan nian, maka respeitu malu nafatin, ta’uk-malu, solidariedade ba malu no hadomi malu, promove nafatin unidade nasionál no hakribi violénsia, hadomi rai ne’e, hanesan uluk ami hadomi hadau tiha hosi ema seluk nia liman,” Veteranu Jeferino da Cruz Salu, ko’alia iha semináriu komemorasaun loron juventude no masakre Santa Kruz, iha salaun edukasaun Oé-Cusse, kinta ne’e.

Nia dehan, juventude tenke hatene papél Estadu no papél Governu, sai sidadaun nasionálizmu no patriotizmu, nu’udar joven domin-na’in no rekonsiliádór ba futuru, tanba veteranu integra nasaun ne’e ba jerasaun nia liman.

Papél veteranu nian maka hanorin jerasaun kontinuasaun atu hadomi nasaun, hadomi povu iha rai ne’e, veteranu nunka husik nia papél ba foinsa’e sira atu ataka-malu.

Nia dehan, ohin loron juventude barak halo kritíka ba Governu no Estadu, ne’e liberdade maibé ho konstrutivu.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here