Juventude Loriku Asuwa’in sira halo manefestasaun hosi Igreja Motael bá Rate Santa Cruz, iha loron 12 novembru 1991. Imajen/Espesiál

DILI, 11 novembru 2021 (TATOLI)–Sobrevivente Masakre 12 novembru Santa Cruz 1991, Luís de Jesus, husu Governu trata sobrevivente Masakre Santa Cruz 12 novembru 1991 hanesan no labele iha diskriminasaun.

“La’ós atu simu subsídiu mak Joventude Loriku Asuwa’in sira ba tuir demonstrasaun 12 novembru hosi Igreja Motael to’o Rate Santa Cruz, maibé partisipasaun nu’udar asaun timor-oan hotu atu hatudu ba mundu katak Timór hakarak ukun rasik-an, mate ka moris tenke ukun-an. Tanba ne’e hakarak trata direitu sobrevivente loloos, labele halo fali diskriminasaun,” Luís de Jesus hateten ba Agência TATOLI, iha ninia rezidénsia, Bemori, kinta ne’e.

Notísia relevante: Masakre Santa Cruz hanesan lisaun ida ba jerasaun foun sira

Nune’e, hanesan sobrevivente nia husu komisaun haree didi’ak dokumentu sira ne’ebé submete ona, atu labele hamosu dezentendimentu ba malu.

“Ha’u simu ona medalla kondekorasaun hosi Governu, maibé kontinua trata dokumentu hodi hetan direitu ba subsídiu mak to’o agora naran la sai no bainhira konfirma iha komisaun omenajen naran laiha. Iha 12 novembru, ha’u tuir ha’u-nia maluk Armindo Soares Adelia Sabu (matebian) no Duarte Soares (matebian) no ami hasoru malu molok militár indonéziu sira tiru ami iha rate,” nia haktuir.

Iha sorin seluk, eis Koordenadór Grupu Juventude suku Bemori, Virgílio Pedro, dehan manifestasaun 12 novembru ne’e laiha konkordánsia ka promesa ruma hodi garante futuru atu hetan apoiu ruma, maibé kontribuisaun ne’ebé juventude fó iha momentu ne’ebá tanba hadomi Timór no lakohi monu ba ema seluk nia liman.

Virgílio Pedro konsege organiza ema na’in-18 partisipa iha misa Saudozu Sebastião Gomes mai to’o Rate Santa Cruz iha loron 12 novembru 1991, ne’ebé­ hetan ona direitu subsídiu hosi Governu.

“Governu ho ninia polítika hodi apoiu subsídiu ba sobrevivente sira, entaun husu atu kontinua halo verifikasaun dadus di’ak atu sobrevivente hotu bele hetan direitu hanesan. Daudaun sobrevivente balun hetan ona, maibé balun to’o agora seidauk hetan, ne’e hanesan diskriminasaun ida, tanba ne’e husu atu halakon tiha maneira ne’e atu la’o tuir dalan ida de’it to’o hetan objetivu loloos,” nia fó hanoin.

Sobrevivente ne’e konta tuir, molok akontese masakre iha tinan-30 liubá, bainhira sai hosi uma, joven sira hatene de’it atu ba tuir misa Saudozu Sebastião Gomes, hafoin lori ai-funan tau iha Rate Santa Cruz.

“Joven sira prepara pamfletu no kamizola ne’ebé kolega pintór na’in-rua Jorge Smith no Vosco Alves mak pinta kamizola Loriku Asuwa’in inklui mós imajen komandante Xanana Gusmão no matebian Domingos Seguradu nian. Iha suku Bemori, ami hamutuk na’in-18 mak organiza malu hodi tuir misa tanba momentu ne’ebá ami tenke halo klandestina, entaun ami la organiza ema barak. ami bolu ema ne’ebé ami koñese atu preparasaun ne’ebé ami halo ona labele monu ba ema seluk ninia interese. Ami halibur malu iha Bemori Taibesi kalan 11 novembru meia noite no ami halo juramentu hamutuk, hafoin fahe ba grupu tolu, atu nune’e labele hamosu deskonfia hosi inimigu sira,” nia konta tuir.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here