Manifestante 12 Novembru 1991 ne’ebé sai vítima iha Masakre Santa Cruz ne’ebé militár Indonézia detein iha Semitériu Santa Cruz nia laran. Imajen/Espesiál.

DILI, 11 novembru 2021 (TATOLI)—Prezidente Konsellu Kombante Libertasaun Nasionál (KKLN), Vidal de Jesus ‘Riak Leman’, hateten Governu la esklui no tau matan nafatin ba família vítima funu nian hahú 1975-1999.

Notísia Relevante: Governu iha polítika fó rekuñesimentu ba família vítima funu 1974-1999

“Konsellu ho ministéiru sempre tau matan ba família vítima funu, martír nia oan liuhosi rekuiñesimentu sira-ne’ebé durante ne’e fó liuhosi kondekorasaun no pensaun,” Riak Leman hateten ba jornalista Agéncia Tatoli iha ámbitu komemorasaun loron nasionál juventude no masakre Santa Crus 12 Novembru bad ala-XXX, iha nia knaar fatin Caicoli, Dili, kinta ne’e.

Governuu atu matan mak ba dahuluk sé mak veteranu tenke rejistu, nune’e iha dahuluk 2003 no  Governu loké rejistu ba daruak nian iha 2009.

Tuir dadus rejistadu veteranu nian, kombatente, martir, no vítima funu (ezemplu hanesan desteradu ba Ataúro), daudaun ne’e iha benefisiáriu rihun 27-resin ne’ebé kompostu hosi pensaun sobrevivensia, pensaun subsisténsia, pensaun espesiál reforma mak simu hela pensaun no antes ne’e hetan kondekorasaun medalla tuir grau ida-idak.

Konsellu Ministru no Ministéiru ba Asuntu Kombantente Libertasaun Nasionál (MAKLN) daudaun ne’e halo hela verifikasaun dadus ba dadus veteranu, kombante ne’ebé rejistu iha 2009 nian hamutuk rihun 124-resin iha territóriu nasionál.

“Tanba ne’e, sira ne’ebé rejistu simu pensaun no kondekorasaun sira, Governu tau matan hela no problema mak ne’ebe la rejistu ne’e, ita labele fó apoiu,” nia dehan.

Tanba ne’e, nia dehan, ho verifikasaun dadus ne’ebé la’o hela bele konklui iha tempu oin mai, hodi verifika ho rigor, nune’e ema ne’ebé merese duni mak sei hetan rekuñesimentu no bainhira verifika hotu bele loké fila-falo rejistu foun ba ema ne’ebé seidauk rejista.

Iha masakre barak mak akontese antes masakre Santa Crus 1991 maibé sobrevivente 12 novembru sira sai prioridade Governu fó subsídiu ba sira ne’e, nia hatán, masakre santa cruz hanesan situasaun ida fanu mundu internasionál kondena Governu Indonézia hodi loké dalan ba konsulta populár

Maibé, nia dehan, sobrevivente sira hosi masakre sira seluk hanesan Masakre Krakras (Viquueque), levantamentu Mauxiga Dare (Ainaro), Fatuberliku no masakre Rotutu mós barak mak simu ona pensaun.

Nia hatutan, ema ne’ebé partisipa iha manifestasaun masakre 12 novembru iha momentu ne’ebá, barak mai hosi organizasaun rezisténsia klandestina hala’o kedas ona servisu inklui ema baibain, tanba ne’e estrutura komite 12 novimentu mós iha hatene sé-sé mak partisipa iha organizasaun rezisténsia.

Lei no estututu kombatente libertasaun klaru hela ba ema sira-ne’ebé partisipa iha funu hodi fó rekuñesimentu.

Mezmu nune’e, Riak Leman la esplika detallu kona-ba lei maibé bazea ba  konstituisaun hodi valoriza sidadaun ne’ebé partisia iha funu.

Nia dehan, sobrevivente 12 Novembru balun ne’ebé uluk estudante mai tuir de’it manifetasaun la to’o oras 24 simu ona subsídiu duke sobrevivente ne’ebé simu orientasaun mai hosi organizasaun rezisténsia mak tuir manifestasaun maibé la simu subsídiu. Maibé, ida ne’e komisaun seidauk hatene no laiha iha lista.

Notísia Relevante: Sobrevivente 12 novembru husu Governu investe maka’as iha setór edukasaun

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here