Ró Berlin Nakroma atraka iha Portu Dili. Imajen TATOLI/António Gonçalves

DILI, 11 novembru 2021 (TATOLI)–Governu liuhosi reuniaun Konsellu Ministru (KM) aprova ona Projetu Proposta Rezolusaun Parlamentu Nasionál, ba ratifikasaun adezaun Timor-Leste ba Konvensaun Regulamentu Internasionál tinan 1973 hodi evita ró-ahi soke malu iha tasi-laran.

Projetu Proposta Rezolusaun ne’e aprezenta hosi Ministru Transporte no Komunikasaun (MTK), José Agustinho da Silva.

“Konvensaun ne’e elabora ho objetivu atu garante seguransa navegasaun no estabelese regra navegasaun sira ne’ebé ró tenke tuir no ró seluk iha tasi-laran hodi evita ró rua ka barak soke-malu,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kinta ne’e.

Hafoin Governu halo deliberasaun, sei haruka ba Parlamentu Nasionál hodi konvoka plenária hodi deside.

“Konvensaun ne’e importante tanba regula regra kona-ba ró, hanesan rekezitu sira kona-ba uza ahi-oan, distánsia entre ró, sinál-sira, forma kondusaun ró, ne’ebé bele dehan regra tránzitu estrada ne’ebé sei aplika iha tasi,” nia esplika.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here