Hakerek na’in, Afonso Soares.

Hosi:

Afonso Soares

Leki-Mau no Dasi-Mau nu’udar família ida ho oan-mane, Bere-Mau, ne’ebé moris ho de’it ai-han husi to’os no husi animál hirak mak hakiak eh servisu nu’udar agrikultór. Família ida-ne’e koñesidu ho naran Mau-Mauk, iha área ne’ebé mak sira horik bá, iha ne’ebé mak lokaliza besik foho-ida, naran Laumera.

Família Mau-Mauk iha mehi ne’ebé di’ak ba sira-nia futuru no hakarak tebes atu oan-mane bele eskola no aprende oinsá bele muda sira-nia moris, liuhusi hamenus todan ne’ebé Leki-Mau no Dasi-Mau iha/responsabiliza hodi tulun sira-nia moris.

Iha atividade kada loron, família Mau-Mauk hakiak animál, halo to’os no kintál. Iha luhan ida-idak nian, hakiak manu no karau; Iha kintál, kuda tomati, brinjela, hudi, ai-dila no modo-tahan oioin; Iha to’os, kuda talas, ai-farina, fehuk nomós batar.

Atu to’o mehi família Mau-Mauk nian, loron-ida, sira deside hodi fahe serbisu ba malu. Nune’e, Leki-Mau tau-matan ba ai-horis iha kintál, to’os nomós animál sira no Dasi-Mau hala’o serbisu sira iha uma-laran. Servisu sira iha kintál, to’os no uma laran, dala-barak mós, Leki-Mau no Dasi-Mau halo hamutuk.

Ho família Mau-Mauk nia serbisu maka’as, kuran ba sira kuaze ladun iha, kada loron sempre iha ai-han ba matabixu, meiu-dia no kalan. Maski, dala-barak, sira han de’it ai-han hirak ne’ebé mai husi kintál, to’os no, loron balu mós, han na’an-manu no karau. Leki-Mau no Dasi-Mau hatoman Bere-Mau ho de’it ai-han sira hosi kintál no to’os, ai-han hirak ne’ebé iha kór no sabór oioin loos, ho razaun sira hela dook husi vila, nune’e difísil ba sira atu hetan ai-han hirak ne’ebé mai husi loja. Maski nune’e, iha tempu balu, Leki-Mau lori produtu balun, hanesan tomati, ai-dila, fehuk, talas, ai-farina, manu eh karau ba fa’an iha vila/sidade hodi sosa foos, mina no masin, ho nune’e bele tulun sira-nia konsumu husi loron ba loron.

Família Mau-Mauk lahatene ai-han hirak ne’ebé mak iha nutrisaun di’ak, maibé sira sente ladun di’ak bainhira husi loron ba loron han hahan ida de’it, hanesan batar eh talas. Nune’e, ho Leki-Mau no Dasi-Mau nia serbisu maka’as hodi hetan manu, karau, tomati, brinjela, hudi, ai-dila, modo-tahan, talas, ai-farina, fehuk no batar ne’ebé barak, sira sempre han ai-han ne’ebé diferente iha matabixu, meiu-dia nomós iha kalan. Maneira ida-ne’e sai tiha nu’udar kostume han ida ba família ne’e, husi loron ba loron iha sira-nia moris.

Baibain, Dasi-Mau mak prepara hahan ba família Mau-Mauk, maibé iha loron balu mós, nia prepara hamutuk hahan ho nia la’en Leki-Mau. Matabixu, baibain, sira han fehuk, ai-farina no talas da’an, iha loron balu, han de’it hudi eh ai-dila tasak; Meiu-dia, dala-ruma, han batar-da’an kahur ho fore-rai, koto no modo-tahan ruma, loron seluk mós, sira han etu no brinjela, nune’e mós na’an-manu; Kalan, dala-ruma, sira han batar-da’an kahur ho modo-tahan ruma no fore-rai. Sira-nia hahan meiu-dia no kalan, iha loron sira seluk, dala ruma, etu/batar-da’an, manu-tolun da’an eh sona ho na’an karau. Dala-barak, família Mau-Mauk han na’an karau, tanba karau balu halai sai husi luhan no monu iha rai-naruk eh ema seluk oho, tanba tama iha sira-nia to’os eh kintál. Ne’e nu’udar sansaun/kastigu ida ba karau na’in no karau ne’e, baibain, fahe entre família Mau-Mauk no to’os eh kintál na’in sira.

Leki-Mau no Dasi-Mau lahatene nein iha koñesimentu uitoan kona-ba ai-han hirak ne’ebé mak di’ak ba kresimentu fíziku (isin) no psikolójiku (hanoin), sira hatene de’it katak han importante tebes ba moris eh labele mate ho hamlaha, nune’e mós ba isin atu labele sai krekas.  Maibé, tanba sira hela dook husi loja no tenki han de’it ai-han hirak ne’ebé sira iha, nune’e tulun tebes Bere-Mau ninia kresimentu fíziku no psikolójiku. Fizikamente (isin-loron), Bere-Mau nia ain la aas nein badak liu no nia isin la bokur nein krekas liu no, bainhira, Leki-Mau eh Dasi-Mau konta istória ruma ba nia, dala-ida de’it nia komprende kle’an loos istória ne’e no, susar tebes ba nia atu haluha fali istória ne’ebé rona ona.

Iha uma, bainhira Bere-Mau nia aman bandu nia atu labele halo buat ruma, nia sempre halo-tuir, nune’e mós nia sempre halo-tuir saida mak nia-aman haruka atu halo, maibé nia sempre husu: apa, tansá hau labele halo eh halo? Bainhira hetan resposta husi nia aman ne’ebé di’ak, nia sempre halo tuir.

Bere-Mau eskola iha ensinu báziku filiál ida mak lokaliza besik foho Laumera, área ne’ebé izoladu tebes, maibé profesór no profesora sira mak hanorin iha eskola ne’e, iha kualidade ne’ebé aas tebes. Iha eskola, Bere-Mau sempre halo belun di’ak ho ninia kolega sira seluk, nune’e mós ho profesór sira; Bainhira rona esplikasaun husi profesór sira, nia komprende ho lais tebes; Iha tempu ne’ebé profesór/profesora bolu nia atu hananu knananuk eh konta ai-knanoik ruma iha ninia belun sira seluk nia oin, nia nunka moe, hodi hananu eh konta ho di’ak tebes. Bere-Mau nu’udar alunu ida mak matenek loos iha eskola no ninia hahalok hetan valorizasaun aas tebes husi profesór no profesora sira. Valór hanesan mós, mai husi inan/aman sira hotu iha área ne’ebá, tanba Bere-Mau nu’udar labarik ida mak sempre kumprimenta ema hotu, iha dadeer, loro-kraik eh kalan no nia gosta koalia ho kualkér ema, maski ho idade ne’ebé sei ki’ik.

Kada loron, Bere-Mau nia inan sempre prepara hahan ruma, hodi ba han iha eskola, bainhira sente hamlaha. Loron ruma nia lori fehuk da’an no, ai-farina da’an, nia inan prepara hodi lori iha loron sira seluk, nune’e mós loron ruma nia lori hudi eh ai-dila tasak, bainhira iha.

Iha intervalu, bainhira nia belun sira ne’ebé inan/aman profesór/profesora foti dose midar eh xokolate ruma kaer hodi han, Bere-Mau hasai nia fehuk eh ai-farina da’an ne’ebé lori, hodi han no nia nunka moe. Kostume ida-ne’e akontese husi loron ba loron iha Bere-Mau nia moris durante eskola iha ensinu báziku filiál izoladu ne’e.

Loron ida, eskola ne’e hetan vizita husi pesoál saúde sira husi Sentru Saúde, hodi fahe informasaun sira ba alunu/aluna, profesór/profesora, nune’e mós inan/aman sira kona-ba oinsá atu fó ai-han hirak ne’ebé iha nutrisaun di’ak, hodi hadi’a oan sira-nia saúde fízika ne’ebé forte, hanoin ne’ebé krítiku, kro’at no iha memória ne’ebé di’ak.

Iha loron ne’e, molok pesoál saúde responsável atu fahe informasaun kona-ba ai-han nutritivu ninia kontribuisaun ba saúde fízika, nia haruka alunu sira hamriik hotu, hodi fihir ba alunu sira hotu ne’e, hosi sorin-loos to’o sorin-karuk no hosi oin to’o kotuk, ikus-mai, nia fihir ba Bere-Mau no, molok bolu nia, haruka uluk alunu sira seluk, hodi tuur, menus Bere-Mau, ne’ebé husu nia atu hamriik nafatin lai. Maibé, Bere-Mau, ho ansi, husu ba pesoál ne’e: ha’u halo sala ruma? Pesoál ne’e hatan ho doko-ulun katak: lae, ita-boot lahalo sala. Nune’e, pesoál ne’e husu de’it ona ba Bere-Mau: ita-boot naran sá? Bere-Mau hatan: ha’u-nia naran Bere-Mau.

Hafoin hatene tiha Bere-Mau, pesoál ne’e bolu: Bere-Mau, ita-boot bele hakat mai oin, halo favór! Bere-Mau hatan ho lian-boot: Prontu no hakat dadaun hodi ba hamriik iha sira-hotu nia oin. Nune’e, pesoál ne’e husu ba alunu sira seluk: imi haree Bere-Mau nia isin-lolon, saida mak imi bele deskreve (kolia kona-ba nia isin-lolon)? Nein ida mak bele hatan. Ho nune’e, pesoál ne’e rasik mak deskreve: Bere-Mau nia ain la aas nein badak liu no, nia isin la krekas nein bokur liu, nia sai nu’udar ezemplu di’ak kona-ba labarik ne’ebé iha saúde fízika nutritiva.

Molok haruka Bere-Mau fila ba nia fatin, pesoál ne’e husu: Bere-Mau, ita-boot bele konta to’ok, ai-han saida de’it mak, baibain, ita-nia inan te’in hodi han? Bere-Mau hatan ho fiar-aan no lian-boot: Matabixu, baibain, ami han fehuk, ai-farina eh talas da’an, iha loron balu, han de’it hudi eh ai-dila tasak; Meiu-dia, dala-ruma, han batar-da’an kahur ho fore-rai, koto no modo-tahan ruma, loron seluk mós, ami han etu no brinjela, nune’e mós na’an-manu; Kalan, dala-ruma, ami han batar-da’an kahur ho modo-tahan ruma no fore-rai. Ami-nia hahan meiu-dia no kalan, iha loron sira seluk, dala ruma, etu/batar-da’an, manu-tolun da’an eh sona ho na’an karau.

Rona tiha resposta husi Bere-Mau, pesoál saúde ne’e, doko-ulun hodi dehan: Bere-Mau alunu ida mak ninia mentalidade di’ak tebes, koalia ho brani, matenek no iha memória di’ak loos. Nia nu’udar alunu ida mak iha saúde psikolójika di’ak tebes, tanba han ai-han hirak ne’ebé iha nutriasun di’ak. Ohin, imi rona Bere-Mau temi ai-han hirak ne’ebé sira han iha matabixu, meiu-dia no kalan, iha sira-nia moris hosi loron ba loron, ai-han hirak ne’ebé mak sira han, maski la’ós hosi loja, nu’udar ai-han hirak ne’ebé iha nutrisaun di’ak tebes.

Molok pesoál ne’e fahe informasaun, nia husu: Bere-Mau, ita-boot nia inan/aman mak sé no sira iha ne’e? Rona tiha ne’e, Dasi-Mau hi’it kedan liman hodi hatan: ha’u mak Bere-Mau nia inan no nia aman mak Leki-Mau, ami-nia família, iha área ida-ne’e koñesidu ho naran Mau-Mauk. Pesoál ne’e hamnasa ho ksolok hodi husu ba inan/aman, alunu/aluna no profesór/profesora sira hotu iha sala-laran, hodi basa-liman ba família Mau-Mauk, hafoin nia louva, hodi fó parabéns ba família Mau-Mauk, nia husu ba inan/aman, profesór/profesora sira hotu, atu kostuma aan hodi fó-han oan sira ho ai-han sira mak família Mau-Mauk baibain han, tanba ai-han hirak ne’e iha nutrisaun di’ak no ai-han nutritivu sei tulun labarik sira sai nutritivu no, ikus-mai, bele tulun ita-nia Estadu ida mak bele hanaran Estadu nutritivu.

Rona tiha lia-fuan hirak ne’e, Bere-Mau h onia inan, sente kontente, to’o matan-been besik atu monu, hodi hanoin de’it iha ida-idak nia laran: afinál, ita han de’it saida mak iha, tanba dook husi vila/sidade, fó-di’ak no bele tulun ita, atu lais eh kleur, ita-nia mehi sei bele hetan ho didi’ak, ho lia-fuan seluk, fatin izoladu no ai-han naturál  halo mudansa ba família Mau-Mauk nia moris iha foho Laumera.

Pesoál saúde ne’e hahú fahe informasaun ba inan/aman, alunu no profesór sira hotu kona-ba importante husi ai-han ne’ebé iha nutrisaun di’ak ba oan sira-nia saúde no ba sira-nia estudu, iha ne’ebé kona-ba ai-han sira, nia hakle’an esplikasaun liután de’it, ho baze ba ai-han hirak ne’ebé família Mau-Mauk han iha sira-nia moris. Nia haktuir katak ai-han ne’ebé iha nutrisaun di’ak sei tulun atu labarik sira-nia isin la sai krekas no bokur, nune’e mós sira-nia ain la badak nein aas liu no sei tulun tebes sira-nia hanoin ne’ebé kro’at no memória ne’ebé di’ak. Bainhira, ita halo nune’e, sei tulun mós Estadu, tanba durante ne’e esforsu oioin Estadu halo hela atu luta kontra nutrisaun ladi’ak (mal nutrisaun) iha ita-nia rain.

Hafoin ida-ne’e, Bere-Mau ho nia inan fila ba uma. Iha ne’ebá, sira haktuir fali buat hotu ne’ebé hetan iha eskola ba Leki-Mau, nune’e nia sente klosok no forte liután atu hodi hala’o ninia servisu loro-loron nu’udar agrikutór.

Família Mau-Mauk, ho badinas liután, hala’o nafatin atividade hotu iha área ne’ebá, iha ne’ebé família sira seluk, iha área ne’e mós, banati tuir ona lala’ok balu kona-ba oinsá hatoman aan ho kuda ai-horis ne’ebé fó nutrisaun di’ak no fó-han oan sira ho ai-han lokál sira. Prátika ne’e tulun tebes inan/aman sira iha área ne’ebá, hodi hamenus sosa ai-han sira husi loja no rai osan barak liután, nu’udar fundu ba oan sira-nia estudu iha nível aas sira.

Ikus-mai, Bere-Mau hasai kursu kona-ba Enjeñeiru Agríkola no nia hetan apoiu husi Governu no Ajénsia oioin hodi dezenvolve setór agríkola iha ninia horik fatin ne’e. Ho ida-ne’e, nia aman Leki-Mau la halo tan ona nia servisu nu’udar to’os na’in, apoia de’it oan-mane, hodi tau-matan ba setór agríkola iha área ne’ebá no, ikus-mai, família Mau-Mauk hetan fiar no kontratu husi Governu hodi hatama ai-han lokál ba eskola sira hotu, atu  hadi’a labarik sira-nia nutrisaun iha eskola sira hotu.

Ne’e mak rohan hosi istória ida-ne’e no lisaun importante sira balu iha istória ne’e mak, hanesan i) alunu sira mak hela iha área izoladu, asesu ba avansu sira seluk limitadu, maibé ba ai-han nutritivu sira la’ós limitadu no presiza  inan/aman sira-nia kontribuisaun, oinsá banati tuir prátika família Mau-Mauk nian ii) presiza fahe informasaun ba alunu no inan/aman sira iha área sira mak izoladu, atu tau importánsia iha produsaun no konsumu ai-han naturál sira mak família Mau-Mauk, baibain, han iha sira-nia moris iii) ho konsumu ai-han lokál sira de’it, sei hadi’a nutrisaun ba labarik sira no hanorin inan/aman sira, hodi rai osan liután ba finansia oan sira-nia estudu no iv) bainhira tuir ezemplu família Mau-Mauk bele muda mós família nia moris, husi to’os-na’in.

Ha’u-nia votu de alegria no parabéns ba belun menoridade sira hotu, iha Timór no iha Mundu tomak, hamutuk ita luta kontra Traballu Infantíl!

Hakerek na’in lisensiadu iha Direito husi UNTL/FUP no konklui mós pós-graduasaun ida husi Fakuldade Direito Universidade Nova Lisboa no nu’udar Asesór Jurídiku iha KFP.

Referénsia husi artigu ida-ne’e: https://www.wvi.org/sites/default/files/BFBH%20Baseline%20Summary%20Tetun_print_V2.pdf

PUBLISIDADEiklan

HAKEREK NO HATÁN

Please enter your comment!
Please enter your name here