Matebian Paulina Ribeiro “Bi Brani”. Imajen/Mídia PR.

DILI, 11 novembru 2021 (TATOLI)—Prezidente Repúblika, Francisco Guterres Lú Olo, liuhusi Dekretu Prezidente Repúblika, númeru 99/2021, 10 novembru, dekreta atu Estadu fó onra fúnebre no hakoi Paulina Ribeiro “Bi Brani” iha Jardim dos Herois da Pátria Metinaro.

Liuhusi Dekretu Prezidente Repúblika ne’ebé publika iha Jornál Repúblika hateten konstituisaun konsagra rekoñesimentu no valorizasaun ba rezisténsia sekulár povu maubere kontra dominasaun estranjeira no kontributu ema hotu-hotu ne’ebé luta ba independénsia nasionál.

Lei kona-bá Estatutu Kombatente Libertasaun Nasionál reafirma vontade atu fó omenajen ba esforsu sira-ne’ebé manifesta hosi kombatente libertasaun nasionál iha luta ba independénsia  nasionál.

“Haree ba kontribuisaun ba luta libertasaun pátria, Komisaun Omenajen, supervizaun rejistu rekursu autoriza Paulina Ribeiro “Bi Brani” iha direitu atu hetan onra fúnebre no hakoi iha “Jardim dos Herois da Pátria, iha Metinaro, nu’udar kombantente libertasaun nasionál,” Prezidente Repúblika, Francisco Guterres Lú Olo, hateten liuhosi komunikadu imprensa ne’ebé Agência Tatoli asesu, kinta ne’e.

Bi Brani nu’udar membru OPMT iha zona 28 novembru, setór sentru Leste.

Iha 1978, hafoin zona libertada rahun, tun mai vila, iha tinan 1981 hahú envolve iha rede klandestina ho ligasaun Adjuntu Solesole.

Iha tinan 1983, hafoin lebantamentu Kraras, Bi Brani deside reziste iha ai-laran kontra okupasaun Indonézia hamutuk ho Komandante Ular Rihir no sira seluk.

Nu’udar membru OPMT, Bi Brani koloka iha regiaun IV, iha parte Manufahi no Manututo.  Iha 1984, Bi Brani aprende lee no hakerek iha ai-laran hamutuk ho membru OPMT no kuadru polítiku no militár sira seluk.

No iha 1999, depois maioria povu hili ukun rasik-an, Bi Brani foin tun mai vila moris hamutuk ho nia família sira.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here