RAEOA hahú ho kampaña vasinasaun ba komunidade Pante Makassar hodi komemora masakre 12 Novembru. Imajen Tatoli/Abílio Elo Nini.

OÉ-CUSSE, 10 novembru 2021 (TATOLI) — Komisaun Organizadora 12 Novembru, hamutuk ho Sentru Juventude Rejiaun Oé-Cusse (CJRO) serbisu hamutuk ho servisu saúde rejionál, hala’o kampaña vasinasaun kombate COVID-19 ba komunidade suku Costa, sub-rejiaun Pante Makassar.

Atividade desiminasaun ne’e realiza liuhosi Rádiu Komunidade Atoni Lifau, nomoos direita ba komunidade sira iha sede suku, bairru no aldeia, atu hasa’e konsiénsia hodi partisipa iha kampaña vasinasaun ne’ebé servisu saúde prepara ona iha fasilidade saúde sira iha teritóriu Oé-Cusse.

“Atividade haat mak sei realiza iha komemorasaun ne’e, primeiru liuhosi talk show iha rádiu komunidade, ohin mai direita hasoru komunidade programa kampaña vasinasaun prevensaun COVID-19,” Prezidente Komisaun Organizadora, José Luis da Costa, informa ba Agência Tatoli iha SJRO, kuarta ne’e.

Kontinuasaun ba aban (kinta) sei realiza semináriu loron ida kontinua kalan relflesaun, no sesta dadeer halo misa sai hosi misa, juventude sira sei halo pawai ba kari ai-funan iha Santa Kruz, depois konsentra iha Sentru Juventude, tanba sei iha bainaka sira hosi autoridade hato’o diskursu kona-ba loron istóriku ne’e.

Adjuntu Diretór Servisu Saúde rejionál, Fugundo Lafu, agradese tanba selebrasaun loron juventude iha Oé-Cusse, hahú uluk ho motivasaun ba komunidade oinsá partisipa iha kampaña vasinasaun iha Oé-Cusse.

“Liuhosi selebrasaun loron istóriku ne’e bele motiva inan-aman no foinsa’e sira, tanba dezde tinan kotuk to’o ohin Timor-Leste enfrenta problema mundiál COVID-19, maibé ho espíritu komisaun 12 Novembru bele ajenda asuntu mundiál ne’e sai matéria iha loron istóriku ne’e,” Adjuntu-diretór servisu saúde rejionál ne’e informa.

Tuir ajenda ne’ebé Agência TATOLI asesu, iha atividade prinsipál haat mak sei realiza iha selebrasaun 12 Novembru, mak hanesan kampaña vasinasaun hahú iha loron 09-10 novembru, no iha kinta realiza semináriu iha salaun edukasaun ho tema, ‘Espíritu As’wain 12 Novembru nian, juventude sai autór importante ba proteje Timor-Leste hosi COVID-19’.

Oradór iha loron semináriu ne’e, Prezidente Autoridade RAEOA ko’alia kona-ba papél autoridade hodi transforma juventude iha prosesu dezenolvimentu iha RAEOA. Oradór daruak mai hosi Konsellu Vetarnu RAEOA ko’alia kona-ba papél veteranu ba espirítu patriotizmu no nasionálizmu hanesan inspirasaun ba jerasaun ohin no futuru.

Nune’e mós oradór terseiru mai hosi Padre Pároku Igreja Numbei, Pe. Albino Marques,  ko’alia kona-ba papél igreja hodi hametin vida esprirituálidade juventude iha prosesu dezenvolvimentu nasionál.

Entretantu, finansiamentu ba selebrasaun 12 Novembru iha tinan 2021 iha RAEOA hetan $3,500 hosi Sekretaria Estadu Juventude no Desportu (SEJD).

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here