Prezidente Repúblika, Francisco Guterres Lú Olo kualia hela ho prezidenti Komite 12 Novembru Gregorio Saldanha iha selebrasaun 29 anos masacre santa Cruz. Imajen TATOLI/ António Gonçalves

DILI, 10 novembru 2021 (TATOLI)—Sekretáriu Estadu Juventude no Desportu (SEJD), Abrão Saldanha, informa Prezidente Repúblika Francisco Guterres Lú Olo sei prezide serimónia komemorasaun loron nasionál juventude no masakre santa cruz 12 novembru (1991).

Notísia Relevante: Sobrevivente 12 novembru husu Governu investe maka’as iha setór edukasaun

“Ohin, SEJD hamutuk ho komisaun organizadora no organizasaun juventude mai konvida Prezidente Repúblika atu partisipa iha selebrasaun loron nasionál juventude no masakre Santa Crúz 12 Novembru. Ohin, ami mai informa mós programa sira-ne’ebé mak iha no konvida Prezidente Repúblika atu prezide selebrasaun ne’e,” Abrão Saldanha hateten ba jornalista sira, hafoin hala’o sorumutu ho Xefe Estadu, iha Palásiu Prezidensiál Nicolau Lobato, Bairru Pite, Díli, kuarta ne’e.

Iha sorumutu ne’e, Prezidente Repúblika Francisco Guterres Lú Olo hato’o nia disponibilidade atu partisipa iha komemorasaun ne’e no sei hato’o mós mensajen Estadu ba juventude.

Xefe Estadu hateten, juventude hanesan forsa ida Estadu nian hodi defende Estadu Direitu demokrátiku, hanesan uluk juventude defende direitu auto-determinasaun no ohin juventude sira hamutuk ho Estadu defende povu.

Entretantu, komemorasaun Loron Nasionál Juventude ba dala-16 no Masakre Santa Cruz ba dala-XXX ho tema “Ho espíritu aswa’in 12 Novembru nian juventude sai autór importante ba proteje Timor-Leste hosi Covid-19” ne’e, sei hala’o programa sira hanesan kampaña vasinasaun ba juventude iha postu administrativu sira, doasaun raan, kompetisaun diskursu públiku, kompetisaun drum band, semináriu, misa no kalan-reflesaun.

Notísia Relevante: 12 novembru, Governu sei hatuur fatuk dahuluk ba Monumentu 12 Novembru

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here