MTKI realiza semináriu iha salaun administrasaun postu Uatucarbau, kuarta (10/11). Imajen TATOLI/Vitorino Lopes da Costa

VIQUEQUE, 10 novembru 2021 (TATOLI)–Ministériu Turizmu, Komérsiu no Indústria (MTKI), iha kuarta ne’e, realiza semináriu hodi motiva grupu agrikultór iha postu administrativu Uatucarbau, munisípiu Viqueque hodi hasa’e produsaun.

Semináriu ho tema ‘hasa’e exportasaun atu hamenus fazeadamente dezekilíbriu balansu komersiál bazeadu ba kapasidade aumenta produsaun nasionál iha Timor-Leste’, ne’ebé mai ho objetivu atu fanun komunidade agrikultór sira hasa’e produsaun rai-laran.

“Foin lalais ita hetan esperiénsia liuhosi programa Cesta Bázika ne’ebé Governu fó prioridade sosa produtu lokál, maibé kuantidade produtu lokál iha rai-laran mak menus liu. Tanba ne’e, ministériu realiza semináriu ne’e hodi motiva agrikultór hasa’e produsaun,” Diretór Jerál Komérsiu hosi MTKI, Cosme Fátima Baptista da Silva, hateten ba Agência TATOLI, iha salaun administrasaun postu Uatucarbau, kuarta ne’e.

Semináriu ne’e partisipa hosi xefe suku, povu agrikultór no entidade relevante hosi suku neen iha postu Uatucarbau.

Nune’e, Diretór ne’e enkoraja agrikultór sira atu esforsu hasa’e produsaun lokál hodi kompete iha merkadu nasionál atubele hetan reziliénsia ekonomia lokál no nasionál.

“Se ita hasa’e produsaun lokál, bele redús importasaun produtu, maibé bainhira la hasa’e produsaun, ita sei nafatin dependénsia ba ai-han importadu sira,” Cosme Fátima fó hanoin.

Notísia relevante: Governu kria subsídiu mensál transporte ba funsionáriu administrasaun públika

Bainhira grupu agrikultór sira konsege hasa’e produsaun agíkola, maka sei ajuda merkadu rai-laran no Sentru Lojístika Nasionál (CLN, sigla portugés) sosa produtu hodi fornese ba subsídiu alimentár ba funsionáriu públiku.

Presiza hadi’a irrigasaun

Iha sorin seluk, Agrikultór hosi suku Irabin de Baixu, postu Uatucarbau, Agostinho Pinto, hateten, difikuldade agrikultór sira durante ne’e maka irrigasaun a’at, tanba ne’e presiza hadi’a.

“Irrigasaun di’ak maka foin bele hasa’e produsaun. Ami-nia grupu agrikultór iha postu Uatucarbau preokupa maka irrigasaun tanba to’o agora seidauk hadi’a, entaun natar barak maka abandona, oinsá maka ami bele hasa’e produsaun,” nia preokupa.

Nune’e, Agrikultór ne’e husu ba Governu atu tau iha planu hodi hadi’a irrigasaun sira ne’ebé iha ona desde tempu okupasaun Indonézia to’o agora.

Iha fatin hanesan, Administradór postu Uatucarbau, Alfredo dos Santos, reforsa difikuldade iha setór agrikultura maka irrigasaun a’at.

“Husu parte relevante tau atensaun. Iha Uatucarbau irrigasaun fatin rua mak Governu halo ona, maibé presiza halo reabilitasaun tanba tinan barak ona seidauk hadi’a,” nia subliña.

Notísia relevante: MAP Baucau planeia konstrui irrigasaun fazeadamente

Irrigasaun haat hanesan Nunubere, Waidasu, Aeoli, no Uaila, seidauk hadi’a to’o agora tanba ne’e natar iha área ne’e abandona iha tinan barak nia laran.

“Durante ne’e ami halo pedidu ba ministériu kompetente, maibé ami simu resposta dehan orsamentu maka laiha. Tanba ne’e, maka to’o agora natar husi fatin haat abandona, ha’u ladún hatene ninia luan, maibé ha’u haree ho matan natar boot. Abitante Uatucarbau sira barak maka ba sosiu fali ho abitante sira hosi Iliomar sira-nia natar,” nia haktuir.

Daudaun ne’e, irrigasaun Baidubu no Komuoli iha postu Uatucarbau mak sei funsiona, maibé seidauk bele sustenta atividade grupu agrikultór iha rejiaun ne’e.

Nune’e mós, Diretór Ministériu Agrikultór no Peska (MAP) Viqueque, Carlos Pinto, dehan, Governu nafatin tau atensaun ba kestaun hirak ne’e, maski prosesu mak la’o kleur.

“Ita nafatin tau atensaun ba irrigasaun, maibé populasaun ninia ezijénsia tenki lalais mak susar tanba ita mós haree ba orsamentu. Kona-ba reabilitasaun irrigasaun Baidubu ne’e eskavatór ita tau iha ne’ebá, maibé agora iha fali Luka no tinan oin sa’e fali hadi’a kanál irrigasaun,” nia informa.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here