DILI, 09 novembru 2021 (TATOLI)-Organizasaun Nasaun Sudeste Aziátiku (ASEAN) ne’e nu’udar organizasaun intergovernamentál rejionál entre nasaun sira iha sudezte aziátiku tanba iha similaridade jeografiku, kultura, interrese no seluktan.

Organizasaun ne’e harii iha loron 8 agostu 1967 iha Bankok, Tailándia husi Indonézia, Malázia, Singapura, Filipina no Tailándia. Depois, inklui mós Filipina, Brunai Darrusalam, Vietnam, Laos, Kambodia no Myanmar. Atualmente membru ASEAN hamutuk 10. ASEAN ne’e iha pilar importante tolu mak hanesan pilar polítika, pilar ekonomia no pilar sosio-kulturál.

Nune’e, Timor-Leste, jeografikamentu, lokaliza mós iha kontinente Ázia no hola parte mós iha rejiaun sudeste aziátiku maka dezde 1975 iha ona hanoin atu integra mós iha organizasaun internasionál ne’e. Tanba ne’e, bainhira restaurasaun independénsia iha loron 20 maiu 2002, Timor-Leste espresa nia interrese sai membru ASEAN iha enkontru bilaterál entre Timor-Leste, Indonézia no Kambodia. Ikusmai, iha loron 4 marsu 2011, Timor-Leste formaliza nia aplikasaun atu sai membru definitivu ida ba ASEAN.

Maske nune’e, hahú 2011 to’o ohin loron, prosesu no adezaun Timor-Leste nian ba Organizasaun Nasaun Sudeste Aziátiku (ASEAN) ne’e sei iha prosesu nia laran, hein aseitasaun no desizaun finál husi membru definitivu ho diretu pleno ba organizasaun nasaun sudeste aziátiku ne’e.

Hahú aplikasaun formál, Timor-Leste halo ona pasu klaru iha konsolidasaun ninia prontidaun hodi sai membru ASEAN, nune’e Timor-Leste konklui ona ho susesu polítika primeiru ASEAN nian ne’ebé mak realiza ho ASEAN Political Security Community (APSC) Fact-Finding Mission (FFM) iha 2019 no interface virtual ho pilar ASEAN Political-Security Community (APSC) no ASEAN Economic Community (AEC) iha 2020.

Esforsu no serbisu ne’ebé Timor-Leste halo liuhusi Ministériu Negósiu Estranjeiru no Kooperasaun (MNEK) ho serbisu hamutuk entre liña-ministeriál sira mak MNEK através Diresaun Jerál ba Asuntu ASEAN koordena no envolve mós sosiedade sívil, akadémiku no mídia sira inklui autoridade relevante sira nune’e bele pró-ativu liután kona-ba adezaun no inkluzaun Timor-Leste iha ASEAN.

Ho razaun ne’e, Ministériu Negósiu Estranjeiru no Kooperasaun liuhusi Diresaun Jerál ba Asuntu ASEAN (DGAA, sigla portugés) organiza mós worskhop ida hamutuk ho mídia sira hodi diskute kona-ba papél mídia nasionál hodi promove adezaun Timor-Leste nian ba ASEAN, iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, Dili, tersa ne’e. Atividade workshop ne’e realiza tuir objetivu DGAA nian ne’ebé hatuur iha Planu Anuál 2021, hodi hasa’e konsiénsia nasionál mídia no hasa’e vizibilidade públiku nian kona-ba importánsia husi prosesu adesaun Timor-Leste nian no komprende papél media nasionál hodi promove asesu Timor-Leste nian ba ASEAN.

Inklui, hametin parseria entre DGAA-MNEK ho ajénsia mídia relevante atu fó advokasia ba Timor-Leste nia adezaun ba organizasaun ne’e.

Produsaun Tatoli I.P ©2021

PUBLISIDADEiklan

HAKEREK NO HATÁN

Please enter your comment!
Please enter your name here