Xefe delegasaun DJDA-MAE, Gaspar Afonso. Imajen Tatoli/Celestina Teles.

COVALIMA, 10 novembru 2021 (TATOLI)—Ministèriu Administrasaun Estatál (MAE), liuhosi Dirasaun Jerál Desentralizasaun Administrativa (DJDA) fó formasaun ba funsionáriu públiku sira iha munisípiu Covalima.

“MAE fasilita formasaun relasiona ita tama ona prosesu atu implementa lei poder lokál. Ita haree parlamentu nasionàl mós aprova lei poder lokál no prezidente repúblika mós promulga ona lei poder lokál,” Gaspar Afonso hateten ba jornalista sira iha Salaun Administratasaun Covalima, kuarta ne’e. 

Objetivu hosi formasaun ne’e atu kapasita funsionàriu no ajente administrativa hotu iha munisípiu Covalima. 

 Formasaun ne’e hahú iha loron 08 novembru no sei ramata iha loron 11 fulan-novembru,  ne’ebé formadór sira mai hosi MAE rasik. Matéria sira-ne’ebé fó hanorin ba funsionáriu sira mak tékniku atendementu públiku, jestaun tempu, jestaun rekursu umanu, jestaun lojistika no patrimóniu, jestaun projetu integradu, jestaun komunikasuan no koordenasaun no Jestaun arkivu no dokumentasaun 

Formasaun ne’e atu hasa’e sira-nia kuñesimentu, nune’e sira bele servisu ho efisiénsia no efikasia. 

Durante ne’e, MAE finaliza ona formasaun iha munisípiu sira mak hanesan munisípiu Ainaro, Aileu, Liquiça, Lospalos, Ermera, Baucau, Manatuto no agora falta de’it Rejiaun Administrativa Espesiál Oé-Cusse Ambeno (RAEO) maibè sei kontinua nafatin. 

Formandu João Martins hateten, formasaun ida-ne’e importante ba ajente administrativu funsionáriu sira iha dirasaun sira hodi fahe informasaun ba malu kona-ba ida-idak nia servisu. 

“Formasaun ne’e prioridade ba tékniku administrativu no asistente administrativa ne’ebé matéria barak mak ami hetan hodi hasae ami-nia kuñesimentu,” nia hateten.

Formandu, João Martins. Imajen Tatoli/Celestina Teles.

Formasaun ne’e, nia dehan, iha duni benefísiu ba sira tanba iha formasaun ne’e funsionàriu no ajente administrasaun sira, fahe mós sira-nia esperiénsia kona-ba sira-nia servisu ne’ebé mak durante sira hala’o iha instituisaun sira.

“Ami mak kompleta malu hanesan balun iha área rekursu umanu, PNDS, oinsá atu halo jestaun ba projetu. Ami husu formasaun atu kontinua nafatin labele para de’it iha ne’e,” nia dehan.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here