Tribunál Distritál Baucau (TDB). Imajen Tatoli/Natalino Belo.

BAUCAU, 10 novembru 2021 (TATOLI) – Tribunál Distritál Baucau (TDB) aplika prizaun preventiva ba arguidu inisiál SS relasiona ho aktu krime ofensa simples hasoru lezada ZS.

Motivu kazu refere akontese iha fulan-outubru, iha suku Fuiluro, postu administrativu Lospalos, munisípiu Lautem, arguidu hamutuk ho vitíma ZS prátika joga karta. Iha momentu ne’e deskonfia na’ok karta rezulta hamosu atake-malu to’o arguidu foti tudik sona lezada ZS hetan kanek iha parte liman no ulun.

Ministériu Públiku (MP) akuza arguidu komete krime ofensa simples prevista iha artigu 146 Kódigu Penál (CP, sigla portugés) ho ameasa pena prizaun loron 30 to’o tinan 3 no konjuga ho arma branka ameasa pena prizaun tinan haat to’o tinan 16.

Nune’e liuhosi prosesu interrogatóriu dahuluk ne’e TDB aplika medida koasaun prizaun preventiva ba arguidu tanba antes ne’e komete uluk ona kazu seluk tribunál aplika Termu Identidade Rezidénsia (TIR).

“Medida koasaun dahuluk ne’e labele hamate ninia hahalok, entaun presiza prizaun preventiva atu aguarda ninia hahalok ne’e labele halo tán, atu prevene situasaun,” Defensór Públiku, José Guterres, hateten iha TDB, Vila Nova, kuarta ne’e.

Entretantu, prosesu interrogatóriu dahuluk ne’e prezide hosi Juis José Escurial, Ministériu Públiku reprezenta hosi Prokuradór Bartolomeu Dias no arguidu hetan asisténsia legál hosi Defensór Públiku José Guterres.

Jornalista         : Natalino Belo

Editór               :Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here