Diretór Ezekutivu EIROS, Joao Paulo Soares Gama. Imajen Tatoli/Egas Cristovão

DILI, 10 novembru 2021 (TATOLI)—Eiros Entrepreneur Institute (EEI), kuarte ne’e realiza semináriu hodi komemora loron masakre Santa Cruz ba dala-XXX ho tema “Juventude ho komportamentu di’ak sai xave ba dezenvolvimentu nasionál”, tanba atu partilla informasaun katak ema-ne’ebé sai di’ak mak sai susesu iha futuru.

“Ita hatene ita iha problema konaba itania pensamentu no ita mós iha buat balun ne’ebé itania mentalidade sira ladun di’ak, liu-liu itania joven sira bele sai hanesan mós empedimentu ba dezenvolvimentu. Tanba ne’e, ita hili tema ne’e atu oinsá bele partilla informasaun katak ema-ne’ebé sai di’ak mak sai susesu iha futuru oin mai,” Diretór Ezekutivu Eiros Entrepreneur Institute (EEI), João Paulo Gama Guterres, hateten ba jornalista sira iha Salaun Eiros, Mandarin, Dili.

Juventude sira bainhira atu hetan susesu mak tenke iha komportamentu ne’ebé di’ak hodi lori dezenvolvimentu ne’e ba oin.

“Iha ami-nia formasaun iha buat haat ne’ebé ami hanorin ba sira hanesan koñesimentu katak sira tenke hatene saida mak sira estuda no aprende iha ne’e. Abilidade katak sira tenke halo, liuhosi teoria no prátika. Atitude mak komportamentu, hanesan ami hanorin ba sira atu oinsá iha komportamentu di’ak, badinas hodi nune’e sira bele halo buat ne’ebé pozitivu,” nia informa.

Timor-Leste komemora loron masakre Santa Cruz ba dala-XXX ne’e, nia husu ba joven sira atu uza oportunidade di’ak hodi aprende buat ne’ebé pozitivu, atu nune’e hamutuk hodi dezenvolve Timor-Leste.

“Objetivu hosi semináriu ne’e hodi komemora loron 12 novembru 1991, ne’ebé juventude loriku asswa’in sira mate tanba luta ba independénsia,” nia dehan.

Administradór da Casa Pós Noviciado Salesiano Comoro, Pe. Jolino Vieira, SDB, hateten semináriu ne’e importante tebes atu dirije ba foin sa’e sira, tanba sira hanesan futuru ba nasaun.

“Haree ba foin sa’e sira-nia moris iha ita-nia rain no fatin seluk ka grupu ne’ebé eziste iha sosiedade no iha nasaun sempre iha diversidade, ideolojia no hakarak oioin ne’ebé dala barak halo sira sai vítima. Entaun iha momentu ne’e hodi hanoin kona-ba loron nasionál 12 novembru fó hanoin ba sira atu oinsá bele hola parte iha dezenvolvimentu nasionál liuhosi diversidade ba iha unidade,”” nia dehan.

Maske imor-oan ka juventude iha grupu oioin, maibé timor-oan tenke tau forsa hamutuk no la’o hamutuk hodi aselera dezenvolvimentu nasionál. .

Tanba, nia dehan, juventude ne’ebé di’ak mak juventude ne’ebé lori pás, rekonsiliasaun, perdaun no juventude ne’ebé moris tuir valór evanjellu.

Entretantu, semináriu ne’e realiza hodi komemora loron masakre Santa Cruz ba dala-XXX no komemora mós Dies Natalis, hanesan loron moris ba Entrepreneur Institute (EIROS) ba dala-18. Iha semináriu ne’e partisipante maihosi formandu Eiros Entrepreneur Institute (EEI) hamutuk 50.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here