Pesoál saúde prepara vasina Pfizer hodi fó ba estudante sira, tersa (09/11). Imajen TATOLI/António Gonçalves

DILI, 10 novembru 2021 (TATOLI)–Estudante 6.060 hosi eskola tolu simu ona vasina Pfizer doze dahuluk, sei falta estudante 587 mak seidauk simu.

Eskola tolu ne’e mak hanesan Eskola Ensinu Sekundáriu Jerál (ESJ) 04 setembru UNAMET Balide, Ensinu Báziku Sentrál (EBC, sigla portugés) 30 de Agostu Comoro no Eskola Ensinu Báziku Filliál (EBF) Duque de Caxias Bemori.

Diretór Eskola EBC 30 de Agostu Comoro, Filomeno Salsinha, relata, totál estudante atu simu vasina Pfizer ba tinan ne’e iha ninia eskola hamutuk 2.200, maibé estudante 1.800 mak foin simu ka reprezenta 80% hosi totál, enkuantu estudante 400 seluk seidauk.

“Ita hein iha doze daruak ne’e estudante hotu bele simu vasina, tanba vasina Pfizer espesiál ba de’it estudante ho idade 12 to’o 17,” Jerente eskola hateten ba Agência TATOLI, iha eskola EBC Comoro, kuarta ne’e.

Notísia relevante: Progresu vasina Pfizer doze dahuluk atinje ona 8.3%

Nune’e mós, Diretór Eskola ESJ 04 setembru UNAMET Balide, Sérgio da Cruz, informa, totál estudante ne’ebé atu simu vasina Pfizer hamutuk 2.202, maibé foin estudante 2.017 mak simu.

“Agora falta estudante 185 mak seidauk vasina ho razaun balun moras, balun seidauk prienxe formuláriu no razaun seluk. Maibé ita la obriga,” nia akresenta.

Iha sorin seluk, Koordenadora EBF Duque de Caxias Bemore, Eliza Martins, hateten, totál estudante ne’ebé atu simu vasina iha eskola ne’e hamutuk 61, maibé estudante 41 mak simu ona vasina tanba inan-aman sira prienxe ona formuláriu.

“Falta estudante 20 mak seidauk. Ami fiar iha doze daruak tuir mai, estudante sira ne’ebé seidauk simu vasina bele simu hotu ona. Tanba vasinasaun ne’e nu’udar maneira ida atu prevene no asegura labarik sira hosi moras perigu seluk,” nia tenik.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here