Mota Irabere iha postu Uatucarbau. Imajen/Espesiál

VIQUEQUE, 10 novembru 2021 (TATOLI)–Administradór postu Uatucarbau, munisípiu Viqueque, Alfredo dos Santos, husu Governu dezenvolve Mota Irabere no fatin rezisténsia iha rejiaun ne’e sai fatin turizmu komunitáriu hodi atrai vizitór sira mai vizita.

“Ha’u sente Governu presiza dezenvolve área rua ne’ebé poténsia sai turizmu komunitáriu hanesan Mota Irabere no fatin rezisténsia ne’ebé guerrileiru sira uza sai subar fatin,” Autoridade postu hateten ba Agência TATOLI, iha Uatucarbau, kuarta ne’e.

Administradór postu Uatucarbau, Alfredo dos Santos. Imajen TATOLI/Vitorino Lopes da Costa

Tuir Alfredo dos Santos, bainhira konsege transforma Mota Irabere sai fatin turizmu komunitáriu, maka sei fó reseita.

“Dala barak ema mai Uatucarbau, sira tenki ba haree Mota Irabere, maibé laiha fasilidade ida iha ne’ebá. Governu mak hanoin harii fasilidade ruma karik, ha’u hanoin ponténsia tebes ba Uatucarbau no munisípiu Viqueque tanba bele fó reseita direta mai ami,” nia akresenta.

Nune’e mós, nia konsirera presiza hadi’a fatin rezisténsia hanesan iha Dinuria, Lia-kaiboka no Lia-bibi, ne’ebé tempu uluk Forsa Falintil uza sai subar fatin.

“Governu bele hanoin ona dezenvolve fatin rezisténsia tanba guerrileiru sira iha postu Uatucarbau eziji hela mai ha’u atu hadi’a hodi bele sai fatin turizmu ,” Autoridade postu tenik.

Nia dehan, fatin poténsia sira bele haree fatin deskansa, restaurante no fasilidade seluk hodi falisita vizitór sira.

Antes ne’e, Governu liuhosi Ministériu Turizmu, Komérsiu no Indústria (MTKI) asina akordu ho autoridade suku hodi hetan apoiu ba programa pilotu dezenvolvimentu turizmu komunitáriu hanesan Uiasarake iha suku Uailili munisípiu Baucau, Lavadain Kreativu iha suku Uaimoritula munisípiu Viqueque, Warda iha suku Maubisse villa munisípiu Ainaro, AST Robena iha suku Nunumoge munisípiu Ainaro no Haut-Ana iha suku Seloi munisípiu Aileu.

Notísia relevante: MTKI asina akordu subvensaun ho grupu traballu dezenvolve turizmu komunitáriu

Governu estabelese ona turizmu komunitáriu iha fatin lima hanesan Com iha munisípiu Lautém, Mota Bandeira iha munisípiu Ermera, Bee-manas Marobo iha munisípiu Bobonaro, Rekiraka iha munisípiu Viqueque, Seloi Kraik iha munisípiu Aileu.

Konseitu turizmu komunitáriu maka integra komunidade iha prosesu turizmu komunitáriu iha fatin ne’ebé estabelese ona tanba durante ne’e la entrega ba líder komunitáriu mak tau-matan ba fatin turizmu sira maibé ba administradór postu.

Aleinde ne’e, MTKI fó apoiu ba grupu kreativu ne’ebé hakarak harii fatin turizmu komunitáriu iha suku, postu administrativu no munisípiu.

MTKI iha papél mak dezenvove área turizmu komunitáriu no kulturál no kria Diresaun Nasionál Turizmu Komunitáriu no Kulturál, ne’ebé iha ligasaun ho Diresaun Jerál Turizmu, ne’ebé diresaun responsabiliza ba planeamentu, implementasaun no orientasaun polítika ne’ebé defini atu dezenvolve setór turizmu komunitáriu no kulturál.

Turizmu komunitáriu no kulturál ho modalidade turizmu ne’ebé iha karater relevánsia komunitária, ho prinsípiu partisipasaun direta komunidade, ba inkluzaun sosiál, sustentabilidade no dezenvolvimentu ekonómiku lokál ho atividade turíztika rurál, relijiozu, kulturál, istóriku, ekoturizmu no servisu turíztiku lokál.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here