Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 09 novembru 2021 (TATOLI)—Sekretária Estadu ba Komunikasaun Sosiál (SEKOMS) tersa ne’e fó formasaun ba editór no jornalista hosi rádiu komunidade konabá papél no knaar rádiu komunidade ba empoderamentu komunidade no dezenvolvimentu.

Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, hateten formasaun ne’e hanesan polítika hosi SEKOMS nian atu kontinua investe nafatin iha rekursu umanu, liu-liu hakarak rádiu komunidade sira bele hatun informasaun ho konteudu ne’ebé kredivel, loos no labele sala.

“rádiu komunidade sira agora iha ona rádiu streaming no iha ona website (portal) ne’ebé la’ós konvensionál de’it maibé agora dijitaliza tiha ona. Tanba ne’e, formasaun sira-ne’e ita hakarak atualiza atu sirania matenek mós aumenta, kapasidade no abilidade mós aumenta, bainhira sira hatun informasaun liuhosi plataforma dijitál,” Merício Juvinal dos Reis “Akara” hateten ba jornalista iha JL Villa, Fatuhada, Díli, tersa ne’e.

Nia dehan, formasaun ne’e fó ba editór no jornalista sira atu bainhira hatun informasaun ruma tenke cross check, hanesan termu no konteudu labele sala, uza tetun tuir estandar no tenke verifika.

“SEKOMS nia hanoin labele husik de’it ba sira maibé tenke fó formasaun nafatin, tanba durante ne’e SEKOMS fó apoia liuhosi transferénsia ba itania rádiu komunidade sira, hosi ne’e de’it la to’o. Maibé, ita tenke investe mós iha rekursu umanu no tenke kontinua fó formasaun ba sira,” nia dehan.

Durante iha formasaun, oradór sira sei fó sirania matenek atu jornalista no editór sira iha rádiu komunidade bele halo servisu ho di’ak.

Tanba, durante ne’e Governu liuhosi SEKOMS apoia ba rádiu komunidade hosi inisiu to’o agora, hanesan iha tinantinan SEKOMS aloka orsamentu ba rádiu komunidade tanba rádiu komunidade konsidera hanesan mídia ne’ebé besik liu ba komunidade iha terenu.

“Ita akompaña sira liu-liu ita hakarak haree sirania konteudu no rekursu umanu tenke di’ak, inklui infraestrutura no fasilidade. Entaun, durante ita apoia entermu infraestrutura balun di’ak ona no balun seida’uk di’ak. Hosi ida ne’e ita hakarak investe nafatin atu hadi’a infrastrutura. Balun fasilidade sei menus, hanesan durante ne’e ita apoia transporta hanesan motor no komputador, maibé nesesidade iha terenu ne’e barak, entaun sira husu atu aumenta. Maske uitoan maibé Governu sei kontinua apoia to’o sira bele hamriik mesak, tanba sira iha liberdade atu hetan mós doadór hosi fatin seluk,” nia dehan.

Nia informa, daudaun ne’e rádiu komunidade ne’ebé eziste iha TimorLeste hamutuk 16 no dadaun ne’e sei aumenta tan rádiu komunidade ida sai 17, ne’ebé SEKOMS kontinua apoia no planu ba tinan oin SEKOMS atu harii tan estasaun rádiu komunidade foun rua iha parte Oeste no ida iha parte Leste.

Jerente hosi rádiu komunidade Cova Taroman iha munisípiu Covalima (suai), Sancho Alves Nahac, sente kontente bele tuir formasaun atu nune’e bele hadi’a produtu sira iha rádiu komunidade Suai.

“Tanba, liuhosi formasaun ne’e bele motiva no aumenta abilidade ne’ebé ami iha, nune’e ami bele halo di’ak liután ami nia produtu sira liu-liu kona-ba hakerek atu públika iha ami nia website.

Hosi formasaun ne’e planu ba oin, sei hadi’a públikasaun iha rádiu, tanba públikasaun ne’ebé iha rádiu komunidade suai seida’uk la’o tuir padraun tetun INL nian.

“Signifika ho formasaun ne’e ami bele foti matenek balun iha ne’e no ami nia públikasaun bele hala’o tuir padraun tetun INL ian,” nia akresenta.

Jerente rádiu komunidade Rai Husar hosi munisípiu Aileu, Julião de Andrade, sente kontente ba atividade formasaun ne’ebé realiza hosi SEKOMS tanba hala’i liubá ba oinsá hakerek uuza eun padraun Institutu Nasionál Linguistíka(INL).

“Formasaun ne’e di’ak, tanba nia prefere liu iha INL no iha aminia halo ona, maibé problema mak iha língua. Ne’ebé, ha’u hanoin formasaun ne’e se língua ne’e la fasil kuandu loron ida de’it ita atu hatene, maibé presiza loron haat no semana ida. Ne’ebé, ha’u sujere karik ba oin SEKOMS sei iha espasu bele fó nafatin formasaun iha kategória línguistika nian, tanba ha’u hanoin problema ba rádiu komunidade hotuhotu mak iha língua. Ho formasaun ne’ebé tuir ona ami sei aplika tuir aminia kapasidade ne’ebé iha,” nia dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here