OÉ-CUSSE, 09 novembru 2021 (TATOLI) — Sekretáriu Estadu Juventude no Desportu (SEJD), Abrão ‘Nokosiku’ Saldanha, segunda ne’e lansa avaliasaun proposta ba programa estímula empreendedorizmu sosiál iha Sentru Juventude Rejiaun Oé-Cusse (SRJO) hamutuk grupu 48.
Grupu 48 ne’e komposta hosi grupu juventude sub-rejiaun Pante Makassar submete proposta 24, juventude sub-rejiaun Oésilo submete proposta 10, juventude sub-rejiaun Nítibe submete proposta 10 no juventude sub-rejiaun Pássabe submete proposta haat.
Maibé trajetu SRJO ba programa empreendedorizmu sosiál nian ba tinan 2021 to’o 2022 presiza grupu kreatividade hamutuk 30 kabe ba sub-rejiaun Pante Makassar presiza grupu 10, sub-rejiaun Oésilo presiza grupu (5), sub-rejiaun Nítibe grupu 10 no sub-rejiaun Pássabe presiza grupu (5).
Tanba tuir geografikamente sub-rejiaun Pante Makassar ho Níitibe akumula suku barak, nune’e presiza aumenta atividade kreatividade juventude.
Nune’e Sekretáriu Estadu Juventude no Desportu, Abrão Saldaha, sujere ba ekipa avaliadór sira konsidera no prioridade uluk ba grupu estímula empreendedorizmu nune’e bele haforsa atividade hodi dezenvolve kreatividade juventude sira-nia inisíativa.
“Ita halo avaliasaun ba programa estímulu empreendedorizmu sosiál, ne’e hanesan espíritu rekuperasaun ekonómika, bainhira ita iha rekuperasaun ekonómika Governu hakarak foinsa’e sira iha forsa saida, iha poténsia oinsá mak ita motiva dudu sira ba setór produtivu hanesan pekuária, peska, turizmu konservasaun ambientál,” Abrão Saldanha koa’lia iha serimónia lansamentu ne’e.
Diretór SJRO, Dionísio Taec, fó-sai katak grupu juventude hato’o proposta ba atividade empreendedorizmu hamutuk 48 maioria ba setór agrikultura.
“Programa estímulu empreendedorizmu iha Oé-Cusse ne’e kuda modo, pekuária hakiak animál, peska, hakiak ikan inklui proposta promove turizmu komunitária iha nivél suku no aldeia,” nia katak.
Entretantu, ekipa avaliasaun ne’e mai hosi Governu no Oragnizasaun Naun Governamentál (ONG) hanesan, Sekretaria Rejionál Asuntu Agrikultura, Sekretaria Komérsiu no Indústria, Parlamentu Foinsa’e, Sosiedade Sivíl, Gabinete Prezidente Autoridade liuhosi servisu promosaun igualdade no inkluzaun.
Tuir ajenda ne’ebé iha, ekipa avaliasaun sei públika rezultadu estímula empreendedorizmu iha loron tolu nia laran.
Finansiamentu programa estímula empreendedorizmu ba grupu 30 ne’e iha tinan 2021-2022 daudaun ne’e SJRO prepara ona fundu rihun $30 ne’ebé hetan apoia hosi Sekretaria Estadu Juventude no Desportu.
Jornalista : Abílio Elo Nini
Editór : Evaristo Soares Martins
