Sekretaria Estadu Juventude no desportu (SEJD) no Autoridade Munisípiu Bobonaro hamutuk ho asosiasaun desportivu sira, diskute termu referénsia konaba implementasaun jogu komunitária iha munisípiu refere. Imajen Tatoli/Sérgio da Cruz.

BOBONARO, 09 novembru 2021 (TATOLI) – Diretór Jerál Korporativa hosi Sekretaria Estadu Juventude no Desportu (SEJD), João dos Santos, informa governu aloka orsamentu $37,350.00 realiza atividade desportu komunitária iha munisípiu Bobonaro hodi komemora loron proklamasaun independénsia 28 novembru ba dala-46.

“Orsamentu ne’e sei aloka fali ba postu administrativu Atabae $4.760.00, Balibo $5.434.00, Bobonaro $9.502.00, Lolotoe $5.773.00, Cailaco $6.112.00 no Maliana $5.773.00. Osan ne’e hodi realiza goju iha idak-idak nia postu administrativu, atu selebra ita-nia loron istóriku 28 novembru bad ala-46,” João dos Santos, ko’alia iha Maliana, tersa ne’e.

Orsamentu ne’e atu finansia atividade desportu komunitária komposta hosi modalidade haat mak hanesan, futeból, voleiból, atletizmu, jogu tradisionál kalik no jogu tradisionál seluk.

Entretantu, Sekretáriu Autoridade Munisípiu Bobonaro, Júlio Carvalho Caero, husu ba administradór postu administrativu neen atu aselera serbisu hodi forma komisaun nune’e jogu ne’e bele la’o-tuir tempu ne’ebé determinadu hosi SEJD. Jogu ne’e sei hahú iha loron 12 novembru no sei termina iha 28 novembru.

“Ne’ebe jogu ne’e importante tebes tanba durante ne’e Covid-19 ema hotu book-aan la di’ak, entaun ha’u hanoin ida-ne’e bele anima fali komunidade sira hodi haree ita-nia munisípiu nomoos atu dezenvolve joven sira-nia talent,” nia akresenta.

Prezidente Asosiasaun Futeból Bobonaro (AFB), Domingos Gouveia Moniz, promete asosiasaun sei apoia arbritrajen no kampu, nune’e jogu ne’e realiza iha munisípiu no postu administrativu sira bele la’o ho susesu.

Purtantu, modalidade futeból primeiru lugár sei hetan osan ho montante $400, segundu lugár $300 no terseiru lugár $250 dolar. Enkuantu voleiból fahe parte rua; feto primeiru lugár $300, segundu lugár $250 no terseiru lugár $200, ba mane mós hanesan.

Ba modalidade atletizmu iha kilómetru lima validade ba feto primeiru lugár hetan montante $150, segundu lugár $100 no terseiru lugár $75. Enkuantu orsamentu ne’e aplika hanesan mós Atletizmu kilómetru hitu ba mane.

Ikusliu ba jogu tradisionál Kalik ba seniór kompostu hosi primeiru lugár $100, segundu lugár $50 no terseiru lugár $30, enkuantu ba juniór primeiru lugár $60, segundu lugár $40 no terseiru lugár $20.

Jornalista         :           Sérgio da Cruz

Editór               :           Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here