Atividade formasaun iha salaun administrasaun munisípiu Viqueque, tersa (09/11). Imajen TATOLI/Vitorino Lopes da Costa

VIQUEQUE, 09 novenbru 2021 (TATOLI)—Ekipa hosi Servisu Autónomu Medikamentu no Ekipamentu Saúde (SAMES) no parseiru sira halo kapasitasaun ba farmaséutiku na’in-45 iha munisípiu Manatuto, Baucau, Lautém no Viqueque kona-ba armazenamentu ai-moruk iha sentru saúde sira.

“Horiseik to’o ohin ami halo formasaun ba profesionál saúde sira, liuliu ba armazenamentu ai-moruk ne’ebé di’ak tuir padraun internasionál,” Diretór Aprozionamentu SAMES, Francisco Borjes, informa ba Agência TATOLI, iha salaun administrasaun munisípiu Viqueque, tersa ne’e.

Notísia relevante: Armazen SAMES importante atu asegura ai-moruk

Formasaun realiza ho koordenasaun entre SAMES, Ministériu Saúde (MS), Organizasaun Mundiál Saúde (OMS) no Programa Ai-han Mundiál (WFP, sigla inglés).

Tuir Francisco Borjes, alvu ba atividade ne’e maka partisipante sira bele jere armazen no asegura stock ai-moruk sira sentru no postu saúde.

“Tanba ne’e ita nafatin fó formasaun ba profesionál saúde sira no kria liña koodenasaun ho sentru no postu saúde hodi halo re-distribuisaun ai-moruk ba malu,” nia akresenta.

Iha fatin hanesan, Responsável Farmásia munisípiu Lautém, Costantinho dos Santos, konsidera formasaun rutina ne’e importante hodi kapasita pesoál saúde sira ne’ebé servisu iha área farmásia.

“Ami mai tuir formasaun hodi hasa’e koñesimentu atu ami bele halo jestaun di’ak ba armazen sira iha kada munisípiu no bele jere serbisu iha sentru no postu saúde sira,” nia dehan.

Jornalista : Vitorino Lopes da Costa

Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here