Komandante Operasaun Interinu Munisípiu Bobonaro, Inspetór José Lelo Bere. Imagen Tatoli/Sérgio da Cruz.

BOBONARO,09 novembru 2021 (TATOLI) – Polísia Nasionál Timor-Leste (PNTL) komandu munisípiu Bobonaro, sei pasa-revista tama sai suku no bairru, atu identifika komunidade no negosiante ne’ebe fa’an fogete ilegál.

Fogete ne’e hanesan ahi-artifisiál ida hanesan painxón ne’ebé ema tiru no bainbain nakfera iha lalehan. Fogete bele uza nu’udar sinál, no mós iha festa. Fogete-festa sira halo naroman furak ho kór oinoin.

Komandante Operasaun Interinu Munisípiu Bobonaro, Inspetór José Lelo Bere, informa, sei halo operasaun Maliana tanba hahu ona sunu fogete iha tempu kalan.

“Agora daudaun Ami seidauk identifika loja ne’ebé fa’an, maibé ami observa iha tempu kalan komunidade sira iha eis PLN no área Sene, hahú ona sunu fogete, ne’e mak ohin ami orienta ona OPS sira atu tún ba buka-tuir fogete sira mai hosi ne’ené,” nia ko’alia komandu munisípiu Bobonaro, tersa ne’e.

Bainhira polísia identifika komunidade ka labarik  sunu fogete, polisia sei rekolla no bolu inan aman ka família presta deklarasaun iha komandu, nune’e bele identifika  fogete ne’e negosiante sé mak faan no tama hosi nasaun ne’ebé.

“Ami husu ba komunidade sira atu koopera ho parte seguransa, hatudu sé mak fa’an atu ita bele rekolla tiha fogete sira-ne’ebe tama ona iha munisípiu Bobonaro,” nia fó hanoin ba komunidade.

Entretantu, Sekretáriu Autoridade Munisípiu Bobonaro, Júlio Carvalho Caero, apela ba sidadaun hotu iha munisípiu Bobonaro, labele fa’an fogete iha merkadu no loja sira iha kapitál Maliana. 

Sekretáriu Autoridade Munisípiu Bobonaro, Júlio Carvalho Caero. Imajen Tatoli/Sérgio da Cruz.

“Ha’u atu fó hanoin de’it sasán sira-ne’e ita-nia estadu bandu, maibé tansá ita sei kontinua fa’an, agora ba oin ita identifika negosiante ne’ebe fa’an, ami sei koordena hodi hapara negósiu ne’e,” nia tenik.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here