Prezidente Autoridade RAEOA, Arsénio Paixão Bano, kolleta fini purifikasaun hare Membramo iha Pante Makassar. Imajen mídia ZEEMS.

OÉ-CUSSE, 09 novembru 2021 (TATOLI) — Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda ne’e hala’o serimónia kolleta fini purifikasaun hare membrano ba faze daruak iha sentru Eskola Tékniku Agrikultura Rejiaun Oé-Cusse (ETARO), suku Lifau, sub-rejiaun Pante Makassar.

“Ha’u agradese tanba RAEOA presiza prezerva fini hare membramo hodi kontinua hatutan, programa purifikasaun ne’ebé hahú kedas iha Prezidente Autoridade primeiru nia mandatu, entaun presiza prodús nafatin fini membramo hodi kontinua hakiak nia orijinalidade, kualidade no aumenta kuantidade, tanba ita-nia identidade atoni maka hare membramo” Arsénio Paixão Bano, informa ba Agência Tatoli, iha Oé-Cusse, tersa ne’e.

Entretantu, Sekretáriu Rejionál ba Asuntu Agrikultura, José Eta, esplika, atividade kolleta fini purifikasaun membramo ba faze daruak ne’e, serbisu agrikultura prodús fini ho sistema tradisionál tanba seidauk iha mákina laboratóriu hodi bele identifika fini purifika membramo ne’e.

“Hare membramo ne’e identiku ho agrikultura Oé-Cusse, entaun presiza enkoraja nafatin ita-nia agrikultór sira-ne’ebé envolve iha peskiza fini hare membramo, bele kontinua produs nune’e bele hasa’e kuantidade orijinalidade fini nian hodi mantein identidade agrikultór hare membramo iha Oé-Cusse, tanba daudaun ne’e iha hare oin haat ona mak hahú kahur entaun presiza identifika liuhosi kuda fini purifikasaun ne’e,” nia katak.

Entretantu, atividade produs fini purifikasaun hare membramo ne’e iha faze dahuluk realiza iha 2019 nia amostra kilograma haat ho nia rezultadu kolleta hetan kilograma 400, nune’e iha faze daruak 2021 rezultadu kolleta hetan kilograma 975.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here