Provedora Direitu Umanu no Justisa, Jesuina Maria Ferreira Gomes. Imajen TATOLI/Francisco Sony

DILI, 09 novembru 2021 (TATOLI)– Prevedór Direitu Umanu no Justisa (PDHJ, sigla Portugés), prevee $1.697.168 iha Orsamentu Jerál Estadu (OJE) 2022 hodi finansia programa direitu umanu no governasaun dia’k no jestaun institusionál.

“Ami nia osan iha tinan fiskál 2022 ho montante $1,697,168, hodi finansia ba programa rua no sub- programa hitu ho atividade hamutuk 21,” Prevedora Direitu Umanu no Justisa, Jesuina Maria Ferreira Gomes, hateten ba Agência TATOLI, hafoin aundénsia ho Komisaun A, iha Parlamentu Nasionál,tersa ne’e.

Notísia Relevante: PDHJ rejista membru PNTL 78 komete violasaun direitu umanu

Hosi totál orsamentu $1,698,168, fahe ba kategoria saláriu no vensimentu $951,286, bens no servisu $720,88, kapitál menór $25.000.

Alokasaun orsamentu ba programa rua, hanesan programa ho kódigu 157 kona-ba Direitu Umanu no governasaun di’ak aloka ho montante $193,024 no programa ho kódigu 510 kona-ba governasaun di’ak no jestaun institusionál alokadu previstu montante $1,504,144.

Kona-ba sub-programa neen, hanesan promosaun, fiskalizasaun, monitorizasaun, peskiza no mós atividade operasionál administrasaun, finansa no lojístika.

PDHJ hanesan órgaun independente ne’ebé iha funsaun apresia no prokura satisfasaun keixa hosi sidadaun kontra podér públiku, hodi verifika ba konformidade ho baze ba lei atu bele prevene no inisia prosesu ba reparasaun injustisa ho baze ba artigu 27º  Konstituisaun.

PDHJ mós ezerse  funsaun hodi kontrola iha ámbitu atividade podér  públiku hanesan Governu, Polísia Nasionál  Timor-Leste, Servisu Prisionál no FALINTIL-Forsa Defeza Timor-Leste (Artigu 3º no 5º Lei númeru 7/2004, 20  maiu).

PDHJ aprezenta 2022 estimativa forsa traballu  kuaje funsionáriu 132, kompsotu feto 55 no mane 77 ho  funsionáriu kargu diresaun no  xefia hamutuk 17.

Notísia Relevante: OJE 2021, PDHJ ezekuta ona 63%

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here