Pesoál saúde prepara hela Vasina AstraZeneca hodi iha sentru vasinasaun, kuarta (20/10). Imajen TATOLI/António Gonçalves

BOBONARO, 08 novembru 2021 (TATOLI) — Komunidade iha postu administrativu Atabae, munisípiu Bobonaro, simu vasina atinje ona 86% iha doze hahuluk kontra COVID-19.

Xefe Sentru Saúde Atabae, Filomeno Pires, esplika, populasaun postu administrativu Atabae hosi idade 18 ba leten ho komorbalidade hamutuk 80% mak simu ona vasina AstraZeneca hodi aumenta imunidade kontra Covid-19.

“Dezde implementasaun vasina to’o agora ita atinje ona primeira doze 86% no segunda doze 40%. Ida-ne’e bele dehan ami-nia hatudu progresu di’ak no komunidade sira barak mak koopera ona ho ami,” nia informa ba Agência Tatoli, iha salaun kapela Atabae, segunda ne’e.

Programa kampaña nasionál vasinasaun iha postu administrative Atabae responsabiliza hosi Ministru Agrikultura no Peska, Pedro dos Reis.

“Ministru mai ne’e ita-nia persentajen foin atinje 50%, durante fulan-ida sira apoia ita hatudu rezultadu di’ak, tanba hosi 50% sa’e kedas ba 86%. Ne’e siginifika hasae taxa kobertura 36%,” nia informa.

Purtantu, postu administrativu Atabae iha Suku haat mak hanesan, Aidabaleten, Rairobo, Hataz no Atabae. Entre suku hirak-ne’e, komunidade suku Aidabaleten hatudu rezultadu di’ak tanba atinje ona 100,4%, enkuantu persentajen sei naton mak suku Hataz ho 65%.

Administrador Postu Administrativu Atabae, Lino Tavares, hateten durante ne’e líder komunitária hahú hosi delagadu, xefe aldeia, xefe suku kopera di’ak ho parte saúde.

“Ami mos sei la para de’it iha-ne’e, tanba iha balu mak seidauk simu, ne’e duni ba oin sei esforsu maka’as, sensibiliza informasaun to’o iha baze, atubele konsiensializa komunidade simu hotu vasina,” nia hateten.

Entretantu, Komunidade suku Atabae, Domingos dos Santos, rekoñese vasina importante ba nia saude tanba bele proteje nia-aan hosi propagasaun pandemia Covid-19.

“Ita la simu vasina mós mate, di’akliu mak sei moris ne’e simu tiha para moras aat ida-ne’e labele kona ita para mate lalais, ne’ebé ohin ha’u foin simu vasina primeiru, agora ha’u sente liman mak moras otuan, agora normál hanesan bainbain,” nia fo sasin.

Entretantu populasaun Atabae ne’ebé alvu hosi idade 18 ba leten ho komorbalidade ne’ebé elijível atu simu vasina hamutuk 6.100. Hosi numeru ne’e rihun lima-resin mak simu ona vasina, enkuantu daudaun ne’e totál vasina tipu AstraZeneca ne’ebé iha konjeladór sentru saúde Atabae hamutuk 50 viál.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here