Juventude Lorico Asuwa’in ne’ebé sai vítima Masakre Santa Cruz 12 Novembru 1991, bainhira Militár Indonézia sira detein no haruka hasai faru ho isin-molik, iha Semitériu Santa Cruz. Imajen/Espesiál

DILI, 9 novembru 2021 (TATOLI)— Igreja Katólika iha Timor-Leste husu ba juventude ohin loron atu banati tuir espíritu masakre Santa Cruz 12 novembru atu hametin unidade nasionál hodi luta ba povu nia moris di’ak.

“Selebrasaun Masakre Santa Kruz 12 novembru ne’e la’ós festa de’it, maibé tenke banati tuir katak uluk hamentin unidade nasionál hodi fó an ba mate atu salva ita-nia rain, entaun joven sira ohin loron tenke voluntáriu fó an ba moris atu salva ita-nia rain hodi povu bele moris di’ak,” Prezidente Ezekutivu Komisaun Juventude Katólika Timor-Leste, Padre João Soares, hateten ba Agência TATOLI, iha Igreja Katedrál Dili, tersa ne’e.

Notísia Relevante: Komité 12 Novembru kontinua valoriza luta uluk nian

Komemorasaun ne’e, atu rekorda tinan 30 liuba, juventude sira hamriik, hakuak malu, la haree ba kór polítiku, rasa no relijiaun hodi hatudu ba mundu katak Timor hakarak ukun rasik an, tanba ne’e sakrifísiu boot ne’ebé juventude sira hatudu tenke sai inpsrirasaun id aba situasaun ohin loron.

Dignifika 12 Novembru, mak  Joven-sira ohin loron presiza voluntáriu fó an ba moris atu salva nasaun, liuliu konsiente hanesan juventude timoroan hodi kapasita an atu sai intelijente no integridade umanu atubele kontribui ba prosesu dezenvolvimentu.

“Ita husu atu la’ós dignifika festa ne’e (12 novembru) ho brutalidade no desvalorizasasun ba an rasik ba sosiedade, maibé buka kontribui nafatin atu estabelese pás iha nasaun ne’e ho kualidade hotu ne’ebé joven  feto no mane  iha,” Amu fó hanoin.

Deferénsia idea ne’ebé ohin loron iha nu’udar parte ida hosi konsekuénsia valór demokrasia, maibé la signifika ignora komunikasaun hodi hamriik iha Bandeira unidade nasionál nia mahon hanesan buat ne’ebé juventude lori asuwa’in hatudu iha tinan 30 liuba.

Juventude mak sai elementu importante no sai autor ba dezenvolvimentu iha país ne’e.

Nune’e, Prezidente Ezekutivu Komisaun Juventude Katolika Timor-Leste ne’e husu ba ukun na’in sira atu kria kondisaun ba joven-sira.

“Ita haree laiha atensaun espesífiku halo ba joven sira, liuliu ukun an ona, maibé la kria kondisaun diak iha ita-nia rain tanba ita ukun tiha ita nia-rain, maibé ema seluk mak kria kondisaun ba ita-nia joven sira no ita-nia joven sira ba fatin sira seluk ka rai li’ur hodi buka moris,” Amu sujere.

Maski nune’e, Responsavél Juventude Dioseze Tolu ne’e apresia ba joven-sira ne’ebé halo sakrifisiu boot hodi husik nia rain ba serbisu iha ema nia rain, maibé fó moris ba nia família.

“Ami fó hanoin ba Governu hodi rezolve problema dezempregu. Ami mós husu joven-sira atu kapasita aan hodi iha abilidade atu kompete kampu traballu no kria kampu traballu ba nian aan rasik no ba ema seluk,” Amu sujere.

Governu mós presiza kria kondisaun eskola sira hahú nivél primáriu to’o universidade iha Timor- Leste atu produs rekursu umanu ho kualidade atu kontribui ba prosesu dezenvolvimntu nasionál.  

Notísia Relevante: Komité 12 Novembru husu Governu ratifika konvensaun ema lakon

Jornalista  : Felicidade Ximenes

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here