Ministru Asuntu Parlamentár no Komunikasaun Sosiál, Francisco Jerónimo. Imajen/Antonio Goncalves

DILI, 09 novembru 2021 (TATOLI)— Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, deside suspende provizóriu aan hosi Komité Sentrál FRETILIN (CCF, sigla Portugés) hodi rezolve problema familiar ne’ebé akontese iha Edifísiu Federasaun Futeból Timor-Leste (FFTL), domingu (07/11).

“Ha’u deside ona atu suspende provizóriu aan hosi Komíte Sentrál FRETILIN (CCF) nuudar membru hodi rezolve problema hafoin asume hikas fali,” Ministru Francisco, hateten liuhosi konferénsia imprensa iha Comite Sentrál FRETILIN, Comoro, tersa ne’e.

Maski, suspende aan hosi CCF, maibé Primeiru Ministru, Taur Matan Ruak, no Sekretáriu Jerál Partidu Frente Revolusionária Timor-Leste Independente (FRETILIN), Mari Alkatiri kontinua fó konfiasa ba Francisco Martins da Costa Pereira Jerónimo, lidera Ministériu Asuntu Parlamentár no Komunikasaun Sosiál (MAPKOMS) tanba konsidera kazu ne’ebé akontese kestaun familiar.

“Hanesan membru Governu, ha’u ko’alia no informa buat hotu ba Primeiru Ministru no Sekretáriu Jerál partidu FRETILIN, maibé iha nafatin konfiansa ba ha’u atu halo serbisu,” Governante ne’e afirma.

Tanba, Governante ne’e konsidera problema ne’ebé akontese iha domingu (07/11) liubá ne’e problema família ne’ebé sei rezolve tuir dalan familiár no bele mós tuir prosesu legál.

“Ha’u haree kazu ne’e akontese tanba iha terseira parte mak hakarak hamonu ha’u nia dignidade,” Governante ne’e lamenta.

Nune’e, Atuál Prezidente FFTL ne’e rejeita informasaun sira ne’ebé espalla iha média sosiál tanba laiha faktu no la loos.

“Ha’u atu hato’o ba públiku katak iha horiseik no ohin iha informasaun tau iha média sosiál liuliu Facebook halo ema hotu hanoin katak kazu afeta ba ha’u ne’e loos, maibé ha’u atu hatete katak buat ne’e laloos no laiha faktu,”Prezidente FFTL ne’e klarifika. 

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here