Diretor Ezekutivu Centro Nacional Chega I.P (CNC), Hugo Maria Fernandes. Imajen Tatoli/Francisco Sony

DILI, 09 novembru 2021 (TATOLI)–Centro Nacional Chega, Institutu Públiku (CNC, I.P) kolabora ho Timor-Leste Estudies Association (TLSA), Asian Studies Association of Australia (ASAA) no Universidade Aberta (UAb) hodi realiza simpóziu internasionál iha ámbitu komemora tinan 30 Masakre Santa Cruz iha loron 12 novembru.

Diretór Ezekutivu CNC, Hugo Maria Fernandes, hateten, atividade ne’e halibur peskizadór timor-oan sira hodi halo reflesaun kona-ba masakre iha tinan 30 liubá, tanba loron ne’e nu’udar eventu krítiku hodi hatudu ba mundu saida mak akontese ba Timor-Leste iha momentu ne’ebá no sai dalan ba independénsia.

“Aleinde ne’e, iha atividade ne’e CNC fó omenajem ba Saudozu Max Stahl liuhosi fó sai nia mensajen, filme biografia badak kona-ba nia partisipasaun iha luta libertasaun Timor-Leste nian,” Diretór Ezekutivu CNC dehan, iha salaun Antigu Prizaun, Balide, tersa ne’e.

Notísia relevante: Masakre Santa Cruz sai markante ba foin-sa’e sira

Simpóziu virtuál via zoom ne’e loke hosi eis Prezidente Repúblika, José Ramos Horta, Prezidente Komité 12 Novembru, Gregório Saldanha, Prezidente Komité Orientadora 25, Constâncio Pinto, Prezidente Conselho de Imprensa (CI), Virgílio Guterres, inklui sosiedade sivil no  sobrevivente 12 novembru.

Atividade ne’e realiza durante loron-rua, hahú loron 09 to’o 10 novembru 2021 no sei iha panelista timor-oan na’in-lima mak sei aprezenta matéria eventu.

“Ita-nia panelista sira hosi Indonézia, Austrália, Moçambique, Canadá, Amérika no nasaun seluk tan, ho ida-ne’e ita organiza liuhosi plataforma online ne’ebé mak Universidade Aberta fasilita, ho totál panelista hamutuk 18 mak sei halo intervensaun,” nia informa.

Iha fatin hanesan, Prezidente Komité 12 Novembru, Gregório Saldanha, hateten, atividade ne’e importante tanba bele akompaña istória Timor-Leste, liuliu istória juventude sira iha tinan 30 liubá, ne’ebé mak dedika-an hodi kontribui ba rai ne’e.

“Atu responde ba istória juventude presiza mentalidade tanba ita hatene katak problema barak nia hun mak mentalidade ne’ebé tenke transforma, atu nune’e inspira mentalidade juventude uluk sira hanesan voluntarizmu, toleránsia, unidade, servisu maka’as, no halo sakrifísiu hodi transforma ba ita-nia jerasaun foun sira hodi bele hala’o servisu iha prosesu dezenvolvimentu nasionál,” nia dehan.

Aleinde ne’e, Gregório Saldanha nota mós katak frakeza  juventude daudaun ne’e mak iha edukasaun uma-laran, liuliu iha eskola no iha sosiedade nia le’et.

“Ida-ne’e mak fatór ne’ebé kontribui, tanba ne’e presiza juventude ne’ebé la’o ho loloos, atu nune’e bele inspira hosi relijiaun katólika hodi bele kaer nafatin istória luta funu nian hodi transforma filafali ba sosiedade timor-oan,” nia fó hanoin.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here