Diretór ezekutivu Konsellu Imprensa, Rigoberto Monteiro. Imajen Tatoli/Natalino Belo.

BAUCAU, 08 novembru 2021 (TATOLI) – Konsellu Imprensa (CI, sigla portugés) realiza formasaun Fact checking ba estudante na’in-50 iha Institutu Katólika Formasaun Profesór (ICFP, sigla Portugés) iha munisípiu Baucau.

Diretór Ezekutivu CI, Rigoberto Monteiro, esplika programa refere hala’o tanba kooperasaun ho embaixada Estadu Unidu Amérika (EUA) iha Timor-Leste ne’ebé implementa ba universidade tolu iha munisípiu hanesan Baucau mak ICFP, Ermera mak Institutu Cafe Ermera no Institutu Politéknika Betanu (IPB) iha Manufahi, Same.

Objetivu hosi formasaun mak liuhosi formasaun joven sira utiliza android ka telefone bele iha koñesimentu hodi identifika ka haree notísia loloos no falsu.

Nune’e mós ajuda hatutan ba komunidade sira atu konsume notísia ne’ebé loos tanba kna’ar ka funsaun refere la’ós de’it mídia no jornalista sira maibé estudante sira nune’e hamutuk atu kombate hoax iha Timor-Leste.

“Maiória joven sira utiliza mídia sosiál hanesan facebook konsume informasaun falsu, dezinformasaun iha online tanba ne’e Konsellu Imprensa halo programa ne’e atu ajuda joven ka estudante sira atu apoia kampaña kombate hoax iha Timor-Leste, liuliu joven sira tanba sira mak uza barak liu facebook,” Diretor ezekutivu Konsellu Imprensa ko’alia iha Villa Nova, segunda ne’e.

Konsellu Imprensa rasik liuhosi programa refere foka liu bá estudante universitáriu sira tanba konsidera iha koñesimentu luan relasiona ho nível edukasaun.

“Atu kombate totál ne’e susar, maibé pelumenus ita bele fó koñesimentu ba estudante sira atu hatene netik saida mak falsu no loos inklui ita enkoraja sira atu lee notísia sira-ne’ebé mídia sira públika,” Rigoberto akresenta.

Iha fatin hanesan, Vise-diretora ICFP Baucau, Magi konsidera formasaun ne’e importante ba estudante hosi ICFP tanba bele hasa’e koñesimentu kona-ba informasaun falsa no loloos.

“Konsellu Imprensa fó oportunidade ba estudante sira hosi ICFP sira atu hatene no hatutan ba família, eskola no komunidade atu hapara buat ne’ebé laloos,” nia fó hanoin ba estudante sira.

Estudante ICFP, Eufenia Martins Belo, agradese ba KI ne’ebé partilla ona informasaun kona-ba maneira utiliza no identifika informasaun iha mídia sosiál.

“Ha’u sei patrilla tutan ba kolega sira, liuliu iha ICFP ne’ebé la marka prezensa, ha’u hetan sira ha’u bele fahe buat-ne’ebé aprende hosi ne’e,” Eufenia hateten.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here