Lansamentu revizaun despeza públiku Timor-Leste 2021, iha auditorium Ministériu Finansa, Aitarak-laran, tersa (09/11). Imajen TATOLI/Egas Cristóvão

DILI, 09 novembru 2021 (TATOLI)–-Ministériu Finansa (MF) no Banku Mundiál iha Timor-Leste, iha tersa ne’e, ofisialmente lansa Relatóriu Revizaun Despeza Públika 2021 ka Timor-Leste Public Expenditure Review (TL-PER), nune’e bele halo mudansa ba gastu ne’ebé di’ak liu no sustentável.

MF kolabora ho Banku Mundiál hodi elabora relatóriu ne’e, ne’ebé akumula dadus hahú hosi tinan 2019, ho objetivu nu’udar feramentu hodi analiza situasaun finansa nasaun no hatudu utilizasaun osan ho kuidadu ba servisu área infraestrutura, nune’e bele halo investimentu klaru.

Iha relatóriu ne’e relata, Timor-Leste ninia kreximentu ekonómiku la’o neneik iha dákada ikus, maibé  despeza públika daudaun ne’e a’as liu, iha mundu kuaze 90% hosi Produtu Internu Brutu (PIB).

Diretór Jerál Planeamentu Orsamentu Ministériu Finansa, José Alexadre Carvalho, hateten kolleta reseita doméstika nian kiik, ho de’it 8% hosi PIB, kompara ho médiu 15% ba rejiaun, ne’ebé halo dezekilibriu iha reseita no despeza ne’e rezulta ona défise orsamentál ne’ebé fó ameasa ba sustentabilidade fiskál.

“Tuir Banku Mundiál, ita-nia investimentu ne’e ladún iha relasaun ho kreximentu ekonómiku ne’e rasik, tanba la signifika orsamentu boot kreximentu di’ak,” Diretór dehan iha ámbitu lansamentu relatóriu TL-PER, iha auditorium MF, Aitarak-laran.

Aleinde ne’e, maski padraun moris mellora ona kompara ho tinan antes ne’e, maibé la’ós benefisia ema hotu, enkuantu ekonomia Timor-Leste hetan suporta  forte hosi despeza públika, maibé la sustentável.

Banku Mundiál rekomenda presiza reforma hodi hasa’e reseita doméstika, atu nune’e Timor-Leste bele hetan fonte despeza no investimentu nesesáriu hodi alkansa país nia meta dezenvolvimentu.

Nune’e, importante atu hadi’a kualidade no efisiénsia despeza públika iha setór saúde no edukasaun liuhosi mellora servisu no hasa’e rezultadu aprendizajen, kria forsa traballu saudável, edukadu no krítiku ba futuru prosperidade Timor-Leste. 

Iha relatóriu ne’e, Banku Mundiál identifika Governu koko hola informasaun hosi despeza públika, tanba iha Orsamentu Jerál Estadu (OJE) 2022, tenta hatun hosi biliaun $2,1 ba biliaun $1,7 maibé hanesan ezersísiu boot ida entre MF no ministériu hotu.

“Tanba ita kustume ultiliza orsamentu pur item, entaun ita agora iha mudansa iha OJE 2021 ho forma programátiku entaun tinan 2022, ita hadi’a atu nune’e ita-nia orsamentu sira ne’ebé aloka foku ba rezultadu, la’os ita tau osan selu de’it ba mákina Estadu nian, maibé la prodús buat ida, tanba ne’e presiza haree didi’ak nune’e orsamentu tinan 2022 alokasaun bele haree ba rezultadu mak aloka,” nia akresenta.

Nune’e, Reprezentante Banku Mundiál iha Timor-Leste, Bernard Harborne, hateten, PER hanesan Banku Mundiál nia instrumentu ne’ebé haree ba situasaun finansa nasaun, nune’e país ida gasta ninia osan ho prudente ba servisu no infraestrutura, ho ninia meta dezenvolvimentu.

“Timor-Leste susesu tebes iha nia kriasaun ba fundu rikusoin hosi ninia rezerva mina no gas sira nian. Maibé, ami-nia revizaun hatudu katak ho padraun despeza hanesan daudaun ne’e, fundu petroliferu bele hotu iha dékada ne’e nia rohan,” Bernard Harborne dehan.

Tanba ne’e, Tuir Banku Mundiál importante tebes atu nasaun ne’e halo alokasaun investimentu ho kuidadu atu sustenta no diversifika ekonomia no uza ninia reseita sira ho maneira ne’ebé efisiente no efikásia.

Relatóriu TL-PER halo rezumu ba opsaun polítika sira atu ajuda Timor-Leste hasa’e nia kolleta ba reseita no hasa’e efisiénsia hosi despeza atu mantein kreximentu ekonómiku ne’ebé sustentavél liu.

Iha tinan 2021, Rendimentu Sustentável Estimadu (RSE) hamutuk $547.873.175, enkuantu totál despeza inisiál biliaun $1,895 no hafoi retifika sa’e ba biliaun 2,1.

RSE iha tinan 2022 hamutuk $554.077.576, enkuantu  totál despeza biliaun $1,675.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here