Sekretáriu Rejionál ba Asuntu Agrikultura lansa programa fila-rai gratuita iha sub-rejiaun Nítibe. Imajen Tatoli/Abílio Elo Nini.

OÉ-CUSSE, 09 novembru 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), tersa ne’e halo lansamentu ba programa fila-rai gratuita kuaze ektare rua (rua) iha suku Suni-Ufe, sub-rejiaun Nítibe ba époka tinan 2021.

“Ita lansa programa fila-rai gratuita, kada tinan autoridade prepara tratór, komunidade prepara kombustível, maibé tinan ne’e hetan afetasaun siklone tropikál seroja, autoridade deside tulun agrikultór fila-rai gratuita, autoridade mak prepara kombustivél no makina tratór fila-rai ba komunidade ho gratuita,” Sekretáriu Rejionál ba Asuntu Agrikultura, José Eta, ko’alia iha seremónia lansamanetu iha Suni-Ufe.

Nia fó sai katak, iha tinan ne’e parte rekuperasaun ekonómika nian, tuir tékniku sira identifika ektare 875 maka prontu ona atu fil- rai iha Oé-Cusse, ne’ebé fó prioridade ba suku ualu (8) perténsia sub-rejiaun Pante Makassar, no suku tolu (3) Suni-Ufe, Usitacu no Bene-Ufe, perténsia sub-rejiaun Nítibe.

“Autoridade fó prioridade tanba suku Cunha Lalisuk no Lifau iha área natar barak, inklui iha Nítibe, maibé la taka dalan ba sub-rejiaun sira seluk bele hato’o pedidu ba autoridade bele fila-rai gratuita ba to’os rai-maran,” nia fundamenta

Xefe suku Suni-Ufe, Crisantu Tamele, agradese ba autoridade RAEOA, tanba tulun komunidade Suni-Ufe apoia tratór ho tratorista atu fila-rai gratuita.

“Ha’u-nia suku sai prioridade ba rekuperasaun fila-rai gratuita, tanba tulun agrikultór sira-ne’ebé laiha forsa bele halo sira to’os hosi kuda ai-hán no produtu iha tinan ne’e, ha’u promete sei fó orientsaun ba xefe aldeia no xefe bairru atu identifíka komunidade sira-ne’ebé presiza fila-rai gratuita,” nia agradese.

Daudaun ne’e autoridade RAEOA prepara tratór hitu hamutuk ho tratorista sira destaka ona iha sub-rejiaun sira.

Notísia relevante: Autoridade RAEOA prepara tratór hitu ba komunidade

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here