Foos ne’ebé rai iha CLN atu distribui ba família vulneravél. Imajen TATOLI/Egas Cristóvão

VIQUEQUE, 09 novembru 2021 (TATOLI)-Autoridade postu administrativu Ossu, munisípiu Viqueque, Agostinho de Sousa, husu Governu liuhosi Ministériu Solidaridade Sosiál no Inkluzaun (MSSI) fahe foos di’ak ba família vulnerável.

“Ha’u simu dadus família vulnerável hosi suku sanulu iha postu Ossu ho totál 312, nune’e ami hatama dadus ne’e ba MSSI no foin lalais sira fahe foos, maibé foos ne’e a’at. Tanba ne’e husu Governu karik hanoin povu vulnerável, tenke fó foos di’ak,” Autoridade Ossu hateten ba Agência TATOLI, hafoin hatama relatóriu ba Autoridade Viqueque, tersa ne’e.

Notísia relevante:  MSSI distribui ona foos saka 28.000 ba família vulnerável

Autoridade lokál ne’e konsidera, inisitiva Governu atu fó apoiu foos ba povu vulnerável ne’e di’ak, maibé presiza haree kondisaun foos.

“Se aban bain-rua Governu hanoin apoiu tan foos, ha’u husu tenki haree di’ak distribuisaun ba povu vulnerável sira. Aleinde apoiu foos, fó mós nesesidade seluk,” nia akresenta.

Iha sorin seluk, Diretór Servisu Solidariedade Sosiál no Inkluzaun Viqueque, Geraldo de Carvalho, rekoñese iha foos a’at, maibé ekipa MSSI sei rezolve.

“Foos ne’ebé foin lalais fahe ba família vulnerável ne’e balun a’at maibé laiha intensaun atu tau foos a’at, foin lalais ami tula fali foos di’ak mai no daudaun rai hela iha ami-nia armazen Viqueque, ami hein hela karreta mai mak sei fahe iha postu Ossu,” nia informa.

Família vulnerável hamutuk 312 simu foos iha setembru 2021 hosi MSSI, ne’ebé kada família hetan foos saka ida.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here