Sekertáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Francisco Sony.

DILI, 09 novembru 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, informa iha kinta (11/11) fulan e’e SEKOMS sei lansa rádiu komunidade ba Ema ho Defisiénsia (EhD) sira.

Notísia Relevante: SEKOMS sei fó apoiu tékniku ba estabelesimentu rádiu komunidade EhD

“Rádiu komunidade ba ema ho defisiénsira sira, ita sei lansa iha loron 11 fulan ne’e. Maibé ho objetivu ita hakarak dedika ba itania maluk defisiénte sira mak tenke jere no sira mak tenke sai jornalista. Tanba, ita labele dedika tiha ba sira maibé ema seluk mak ba servisu iha ne’ebá, ne’e hanesan la valoriza sira,” Merício Juvinal dos Reis “Akara” hateten ba jornalista sira iha JL Villa, Fatuhada, Díli, tersa ne’e.

Tanba, nia dehan, Ema ho Defisiénsia sira hateten katak sira defisiénte maibé sira-nia matenek no sira mós bele sai jornalista. Sira tuir ona formasaun kona-ba jornalizmu báziku iha rádiu Liberdade no fatin barak, entaun agora sira iha kapasidade.

“Ha’u dehan ona ba diretór katak bainhira rádiu komunidade ne’e harii, jornalista no jestór hotuhotu tenke ema ho defisiénte,” nia dehan.

Diretór Nasionál Promosaun Dezenvolvimentu Mídia Lokál, Jose da Costa, hateten planu estabelesimentu rádiu komunidade ba ema ho defisiénsia iha tinan 2019, maibé tanba kestaun balun no SEKOMS sei komunika ho Asosiasaun Defisiente Timor Leste (ADTL), tanba ne’e iha tinan 2021 foin hahú halo instalasaun.

Notísia Relevante: ADTL agradese Governu estabelese rádiu komunidade ba ema ho defisiénsia sira

“Entaun, iha tinan ida ne’e teknikamente ita tau osan uitoan liuhosi fundu transferénsia ba rádiu komunidade ema ho defisiénsia. Hanesan iha fulan rua ba kotuk, sira halo ona sirania asembleia no ita mós partisipa, daudaun ne’e sirania estrutura iha ona, liu-liu membru konsellu no prezidente konsellu,” nia dehan.

Hafoin, halo asembleia ba estrutura, hosi ne’e dirasaun SEKOMS orienta ekipa tékniku hodi halo instalasaun ba rádiu komunidade ne’ebé uza ho sasán rezerva.

Maibé normalmente apoia téknika ne’e SEKOMS mak tau orsamentu uitoan atu hola ekipamentu ba instalasaun, maibé daudaun ne’e ninia prosesu la’o hela. Tanba ne’e, SEKOMS haree sasán ne’ebé rezerva foti no tékniku sira mai instala no daudaun ne’e instalasaun 100% ona no hein de’it lansamentu no hein atu rejistu iha ANC atu hetan legalizasaun ba frekuente hodi sai legál hanesan estasaun ida.

Jose da Costa informa, bainhira prosesu instalasaun remata iha fulan kotuk SEKOMS fó ona formasaun ho durasaun semana ida ba ema ho defisiénsia sira atu oinsá sira jere estasaun rádiu ida-ne’e.

“Tanba, rádiu ne’e ita la’ós oferese ba ema defisiénsia matan no tilun, maibé oferese ba ema defisiénsia hotu-hotu,” nia dehan.

Notísia Relevante: SECOMS sei harii rádiu komunidade ba ema ho defisiénsia sira

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here