Sekretáriu Rejionál ba Asuntu Agrikultura, José Eta. Imajen Agência TATOLI/Abílio Elo Nini.

OÉ-CUSSE, 08 novembru 2021 (TATOLI) — Projetu rekonstrusaun Gabiaun unidade rua iha Rejiaun Administrativa Espesiál Oé-Cusse Ambeno (RAEOA) finaliza ona.

Projetu Gabiaun rua ne’e lokaliza iha Natar Bona, aldeia Kuatua, suku Usitaco, sub-rejiaun Nítibe, no ida iha Natar Kolam-Xina, suku Lifau, sub-rejiaun Pante Makassar ho medida distansia metru 50.

“Projetu rekonstrusaun Gabiaun hosi diresaun agrikultura ba protesaun área produtivu sira iha unidade 14, unidade neen hosi Diresaun Rejionál Infraestrutura. Progresu ba projetu hirak-ne’e kuaze la’o di’ak, iha unidade rua maka konklui ona ho 100%, ida iha suku Usitaco no ida iha suku Lifau,” Sekretáriu Rejionál ba Asuntu Agrikultura, José Eta, informa ba Agência Tatoli iha Horta Oé-Cusse, segunda ne’e.

Entretantu, projetu rekonstrusaun unidade 16 seluk ho progresu serbisu atinje ona 50% ba leten, no unidade rua iha suku Cunha, aldeia Noafafo, iha bairru Sonamnasi no aldeia Noe-Ninen, iha bairru Aenmat mak foin atinje 30%.

“Projetu rua konklui ona, daudaun ne’e empreza na’in sira hatama ona pedidu mai iha agrikultura, ita sei ankamiña ba Prezidente Autoridade atu nune’e bele ajenda bainhira mak entrega, maibé tuir planu iha fulan-novembru ne’e bele entrega ona ba autoridade, tanba projetu Gabiaun ne’e atu normaliza hikas área produtiva natar no to’os tanba hetan estragu hosi dezastre naturál iha iha 04 abríl,” nia katak

Nune’e mós, projetu rekonstrusaun Gabiaun Kolam-Xina, suku Lifau ezekuta hosi empreza Sikoneroc Unipesoál Lda ho valór kontratu $15,779.09 no projetu rekonstrusaun Gabiaun iha Bona, suku Usitaco, ezekuta hosi empreza Oélmau Unipesoál Lda, ho valór kontratu $16,120.88.

Notisia relevante: Autoridade RAEOA aloka millaun $2-resin ba rekonstrusaun gabiaun

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here