Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 08 novembru 2021 (TATOLI)—Embaixadór Timor-Leste ba Repúblika Mozambique Francisco Miranda Branco, Embaixadór ba Reinu Béljika Jorge Trindade no Embaixadór ba Reinu Tailándia Juvêncio Martins, segunda ne’e hala’o sorumutu no despede Prezidente Repúblika molok atu dezloka ba nasaun destinadu.

Embaixadór Timor-Leste ba Repúblika Mozambique, Francisco Miranda Branco, hateten iha sorumutu ne’e, Prezidente Repúblika husu ba Embaixadór dezignadu atu reprezenta Estadu Timor-Leste ho didi’ak no ho dignidade.

Notísia Relevante: Asaun diplomátika tenke korresponde ho nesesidade nasaun

“Mensajen Prezidente Repúblika nian tenke reprezenta Estadu ho didi’ak no ho dignidade, buka forma oioin atu halo aproximasaun ba nasaun ne’ebé reprezenta ho ita-nia nasaun,” Embaixadór Timor-Leste ba Mozambique, Francisco Miranda Branco, hateten ba jornalista hafoin ramata sorumutu ho Xefe Estadu iha Palásiu Prezidensiál Nicolau Lobato, Bairru Pite, Dili, segunda ne’e.

Branco hateten, prioridade ne’ebé nia sei halo mak hakbesik an ba nasaun Mozambique no nasaun Afrika ne’ebé ko’alia lian ofisiál Portugés (PALOP) ninian ho Timor-Leste, tanba dezde iha tempu defisíl hamutuk ho TL iha luta libertasaun.

Nune’e, papél mak buka forma oioin atu halo interkámbiu hosi intelektuál dosente no estudante sira atu nune’e bele kuñese malu di’ak liután.

Enkuantu, sorumutu ne’e Embaixadór foun ba Repúblika Mozambique Francisco Miranda Branco, Embaixadór TL ba Reinu Béljika Jorge Trindade, Embaixadór TL ba Reinu Tailándia Juvêncio Martins, hodi kumprimenta Xefe Estadu molok dezloka ba nasaun sira refere.

Tuir ajenda, iha loron 15 novembru ne’e Embaixadór Francisco Miranda Branco no Jorge Camões sei dezloka ba nasaun destinadu no Embaixadór Juvêncio Martins  sei dezloka iha  26 novembru.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here