Kazu Asalta bís iha Gariuai. Imajen espesiál.

BAUCAU, 08 novembru 2021 (TATOLI) – Komandu Pólisia Nasionál Timor-Leste (PNTL) Munisípiu Baucau aplika Termu Identidade Rezidénsia (TIR) ba autór atake bís diresaun Viqueque-Dili ne’ebé akontese iha Gariuai bazea ba orientasaun hosi Ministériu Públiku (MP).

Segundu Komandante PNTL Munisípiu Baucau, Superintendente Asistente, José Casmiro de Carvalho informa, serbisu polísia liuhosi servisu sekreta J2 lori ona suspeitu inisiál DSF iha loron Dumingu (07/11) oras 10:00 kalan hodi submete ba investigasaun ne’ebé deskonfia halo agregasaun fíziku ba ajudante bís diresaun Viqueque-Dili.

PNTL rasik identifika suspeitu hamutuk na’in-haat liuhosi evidénsia vídeu ne’ebé virál iha rede sosiál.

Enkuantu na’in-tolu seluk sei kontinua buka-tuir no hein hela mandadu hosi Ministériu Públiku inklui sei notifika mós ba motorista no ajudante bís atubele kompleta prosesu investigasaun. 

Segundu komandante Komandu PNTL munisípiu Baucau, Superintendente Asistente, José Casmiro de Carvalho. Imajen Tatoli /Natalino Belo.

“Suspeitu ne’ebé identifika mak ida lori ai-dona baku ajudante ne’e no orientasaun Ministériu Públiku ita aplika ona Termu Identidade Rezidénsia (TIR),” Segundu Komandante PNTL Baucau, ko’alia Villa Nova, segunda ne’e.

José esplika, serbisu sekretu J2 asegura suspeitu no entrega direita ba ba seksaun investigasaun kriminál hafoin halo identifikasaun ne’ebé bazea ba orientasaun MP aplika TIR ba suspeitu.

PNTL rasik seidauk iha informasaun hosi motorista tanba hafoin akontesimentu ne’e seidauk hato’o keixa ruma, maibé PNTL halo asaun tanba relasiona ho informasaun ne’ebé lansa iha rede sosiál.

Entretantu kaze refere akontese iha loron sábadu (06/11) iha área Suku Gariuai, Postu Administrativu Baucau Villa, Munisípiu Baucau. Motivu hosi akontesimentu ne’e PNTL kontinua halo indentifikasaun.

Jornalista         :           Natalino Belo

Editór               :           Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here