Ekipa Saúde husi Sentru Saúde Bekora, Munisípiu Dili hatudu maneira kose nehan ba estudante Ensinu Báziku Filiál Kamea durante selebrasaun loron mundiál saúde orál 2019, kuarta, (20/3/2019). Imajen Egas Cristovão

DILI, 08 novembru 2021 (TATOLI)— Ministériu Saúde hatudu kompromisu kontinua hala’o kampaña promosaun liuhosi programa  Servisu Integradu Saúde Komunitária (SISCA,sigla Portugés) ba sidadadaun sira atu kuidadu saúde orál.

“Ministériu Saúde nafatin halo esforsu halo kampaña saúde orál no promosaun edukasaun sivika ba sidadaun sira liuliu estudante sira atu kuidadu saude oral ka nehan,” Xefi Unidade Saúde Orál Ministériu Saúde Vitorino da Costa Araújo, hateten ba Agência TATOLI, iha knaar fatin Lahane, Dili, segunda ne’e.

Notísia Relevante: Kuidadu Saúde Orál, Kose Nehan Loron Ida Dala Rua

Kampaña nasionál ne’e hala’o liuhosi programa SISCA iha eskola sira atu estudante sira iha koñesimentu hodi asegura saúde orál liuliu moras nehan.

Alende ne’e, Profisionál saúde sira mós kontinua halo kampaña liuhosi programa kuidadu saúde primariu liuhosi sentru saúde sira.

“Ita nia pasiente sira mai halo tratamentu nehan, ami kontinua husu atu sira kuidadu sira nia nehan hodi loron ida hamoos ka eskova dala rua, hafoin matabixu no han kalan liuliu molok atu deskansa ka toba,” nia sujere.

Nune’e, nia husu ba sidadaun sira hanesan labarik no ema boot presiza kada fulan-tolu to’o neen vizita klínika dentária atu konsulta nehan atu hatene situasaun nehan iha ibun laran.

Atu kuidadu saúde orál, dahuluk kose nehan minimu loron ida dala rua hanesan dader hafoin matabisu no kalan molok toba.

Daruak, presiza atu hadook aan hosi abitu sira hanesan fuma tanba fuma afeta direta ba saúde orál no mós labele mama malus ka songe ne’e mós afeta direita ba kualidade saúde orál.

Ikus liu, husu komunidade hapara konsumu hahán sira ne’ebé saudavél liuliu ida ne’ebé la’ós midar barak hodi fó filafali impkatu saúde orál.

Tanba saúde orál mak hanesan problema ida ne’ebé preokupante tanba nutrisaun kualidade vida no hahán sira ne’e tama hosi ibun mak ba isin-lolon.

Daudaun, médiku dentária iha Hospitál Nasionál Guido Valadares (HNGV) no ospitál referral lima iha atu konsulta no halo mós promosaun paisente sira atu prevene no kuidadu saúde orál.

Iha Timor-Leste rejista médiku espesialista rua, médiku dentista jerál iha na’in-sia, enfermeiru dentista hamutuk 53 no tékniku dentaria hamutuk 68.

Notísia Relevante: SSB presiza ekipamentu saúde orál

Jornalista  : Felicidade Ximenes

Editór         : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here