Osan Dolar Amérika. Imajen/Espesiál

OÉ-CUSSE, 08 novembru 2021 (TATOLI) —  Diresaun Rejionál Infraestrutura (DRI) Rejiaun Administrativa Espesiál Oé-Cusse Ambeno (RAEOA), prevee orsamentu rihun $200-resin reabilita edifísiu Departementu Transporte Terrestre (DTT) iha rejiaun refere.

Nune’e mós lutu ba sentrál Eletrisidade Timor-leste (EDTL) inklui halo konstrusaun foun ba funsionáriu destakadu EDTL iha sub-rejiaun Oésilo, Pássabe no Nítibe.

“Ami-nia prioridade primeiru maka reabilitasaun ba serbisu Departementu Transporte no Terrestre agora konkursu públiku anunsia ona, tanba edifísiu ne’e kuak ona kuaze tinan 10 seidauk halo reabilitasaun no manutensaaun tanba to’o tempu udan tama estraga dokumentu públiku balu iha edifísiu ne’e,” Diretór Rejionál Infraestrutura RAEOA, Candido dos Reis Amaral, informa ba Agência Tatoli iha Santa Rosa, Oé-Cusse, segunda ne’e.

Nune’e mós halo lutu ba kampaun ekipamentu IJE nian iha suku Lalisuk, aldeia Banoco, nomoos lutu ba sentrál EDTL Oé-Cusse nian tanba hala’o servisu komersiál no administrasaun nian, inklui postu destakadu EDTL iha sub-rejiaun Oésilo, Pássabe no Nitibe.

“Ninia Bill of Quantity (BoQ) preparadu ho nia dezeña daudaun ne’e sei prosesu hela iha Unidade Aprovizionamentu no lojíztika nian, nune’e iha tempu badak sei anunsia ba públiku ho nia orsamentu prevee hamutuk rihun $200-resin,” nia katak.

Jornalista         : Abílio Elo Nini
Editór               : Evaristo Soares Martins

PUBLISIDADEiklan