Administradór Viqueque, Januario Soares ‘Boly’ no entidade relevante halo abertura ba formasaun ospitalidade ba jestór restaurante no guest house iha Viqueque, iha salaun Borala, segunda (08/11). Imajen TATOLI/Vitorino Lopes da Costa

VIQUEQUE, 08 novenbru 2021 (TATOLI)-Sentru Treinamentu Integrál no Dezenvolvimentu (CTID, sigla portugés) Canossa Baucau fó kapasitasaun ba jestór sira hosi restaurante no guest house hamutuk 19 iha Viqueque, kona-ba ospitalidade durante loron-10, hahú 08 to’o 18 novembru 2021.

Diretora CTID Canossa Baucau, Maria Filomena da Costa Freitas, konsidera formasaun ne’e hanesan parte ida hosi dezenvolvimentu rekursu umanu, tanba ne’e importante tebes.

“Ohin ami fó formasaun hodi hasa’e sira-nia koñesimentu atende kliente sira ho di’ak,” Dirijente ne’e hateten ba Agência TATOLI iha salaun Borala, Viqueque, segunda ne’e.

Nune’e, Maria Filomena agradese ba partisipante ne’ebé ho disponibilidade bele partisipa iha formasaun ne’e.

“Ami sei hanorin sira oinsá prepara hahán no fatin ba klinte sira ne’ebé atu ba deskansa iha sira-nia fatin,” nia akresenta.

Atividade ne’e realiza tanba hetan apoiu no fiar hosi Governu liuhosi Sekretaria Estadu Formasaun Profisionál no Empregu (SEPOFE), ne’ebé apoia fundu ho montante $12.000.

Formasaun bazeia ba peskiza

Iha fatin hanesan, Diretór Servisu SEFOPE Viqueque, Simão da Silva, hateten, formasaun ne’e bazeia ba peskiza ne’ebé diresaun nasionál formasaun halo ba loja, restaurante no guest house, ne’ebé klinte sira fó hanoin katak atendimentu durante ne’e seidauk másimu, tanba ne’e maka parte diresaun koordena ho CTID hodi realiza ativudade ne’e.

“Ita seidauk iha formasaun reguler ba ospitalidade. Tanba ne’e, iha tinan 2021 Governu fó fiar ba CTID Canossa Baucau hodi realiza formasaun movel iha munisípiu Viqueque,” Simões dehan.

Iha biban ne’e, Administradór Viqueque,  Januario Soares ‘Boly’, agradese ba sentru kapasitasaun ne’e tanba bele fahe ona koñesimentu ba partisipante sira hodi atende kliente ho efesiénsia no efikásia.

“Kapasitasaun ne’e importante atu ita bele hatene maneira simu ema no prepara fatin ba ita-nia vizitór sira mai ita-nia fatin. Aban bain-rua, bainhira Viqueque dezenvolve ona fatin turizmu sira, presiza mós fatin deskasa no fatin han, nune’e bainhira ema mai karik ita preparadu hodi simu de’it,” nia subliña.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here