Saudozu António João Gomes da Costa ‘Ma’hunu Bulerek Karathayano’.

DILI, 06 novembru 2021 (TATOLI) — Família ho entidade sira sábadu ne’e, iha Jardim dos Herois Metinaro, realiza misa rekién no kari ai-funan ba saudozu António João Gomes da Costa ‘Ma’hunu Bulerek Karathayano’ nia mate tama ona loron 40.

“Ida-ne’e mak ita haree  reflete durante loron haat-nulu ninian, ho  orasaun nafatin  ba saudozu hakmatek iha fatin di’ak,”  Padre Selebrante Angelo Salsinha, esplika liuhosi omília durante selebrasaun misa.

Saserdote ne’e hateten, iha leitura  evanjellu Jop dehan nun’e “ha’u hakarak tebes atu liafuan ne’ebé hakerek iha livru besi-riti kro’at ida atu la lakon”.

Misa rekién ba memória no kari ai-funan iha Jardim dos Herois Metinaro. Imajen Agência TATOLI/Nelson Sousa.

“Ida-ne’e, reflete duni uluk ita la’o hamutuk atu hakerek iha ita-nia istória iha besi-riti kro’at la lakon, istória ne’ebé hakerek hela mak mate ka moris ukun rasik-aan, ne’ebé erói no eroína no ita hotu ohin loron la’o iha dalan  mehi,” Padre Angelio haklaken.

Maibé atu hakerek istória iha besi kroat atu la lakon bainhira haree Maromak nia prezensa iha istória dalan moris nian, liuhosi sofrimentu, inserteza, problema família no nasaun nian.

“Afirmasaun ida-ne’e komprende no haree nu’udar kompaneiru ita fó onra ba ida-ne’e la’o ho sentidu no prinsípiu mehi ne’ebé naruk,’’ Padre Angelo subliña.

Padre ne‘e hateten, saudozu Ma’hunu komprende ona saida mak lialoos no moris ho fiar ne’ebé nia iha liuhosi dedikasaun no luta ho korajen determinasaun  abnegasaun to’o saran-aan.

Horta husu kontinua obra Ma’Hunu

Eis Prezidente Repúblika, José Ramos Horta, hato’o nia solidariedade ba família Ma’hunu no  liuliu ba joven sira atu kontinua nia obra ida ne’e koletiva hosi lideransa tomak atu lori ba oin nafatin hanesan nia mehi.

Ramos Horta tau ai-funan ba rate saudozu Ma’hunu iha Jardim dos Herois Metinaro. Imajen Agência TATOLI/Nelson Sousa.

Horta   fó sasin, nu’udar hamutuk ho Mauhunu, Rogeiro Lobato  iha idade  joven to’o 1975, ne’ebé  eskola iha Soibada to’o kuarta klase.

Nia haktuir,  Ma’hunu sempre hamnasa no matenek, iha  1974 to’o 1975 halibur iha ASDT no nakfilak ba FRETILIN, dalabrak ho Ma’hunu lokraik-lokraik halo kampaña promosaun ASDT nia programa iha Dili.

Liutiha guerra sivíl proklamasaun unilaterál independénsia, Primeiru-Ministru RDTL no Vise Prezidente FRETILIN, Nicolau Lobato, foti desizaun Mari Alkateri, Ramos Horta, Rogério Lobato atu sai hosi Timor-Leste ba diáspora

“Nicolau Lobato nia lia-fuan defende ita-nia kauza, nune’e ami fahe malu tuir orientasaun” Eis Ministru Negósiu Estranjeiru no Kooperasaun nee haktuir.

Maibé Ma’hunu hamutuk ho Komité Sentrál FRETILIN (CCF, sigla portugés) no Xanana Gusmão no sira seluk kontinua lidera funu simu todan hosi Nicolau Lobato bainhira iis kotu iha kombate.

Maske dook-malu no bainhira komunikasaun estabelese iha diáspora komunika no rona atividade entre frente diplomátika no frente armada.

“Hafoin liutiha indepedénsia  hasoru malu fali ho Mau’hunu akompaña nia moras evolusaun, ida ne’e mak hamutuk maibé kompletu iha nia biografia ne’ebé antes ne’e fó-sai ona,” Eis Prezidente Republika ne’e akresenta’.

Nune’e mós, Nélio Maukinta ‘Lagarto’, ne’ebé uluk eskolta Saudozu Ma’hunu, haktuir, la’o  ho saudozu dezde iha 1983 to’o 1991 mak inimigu hafahe iha rai Fatudu, Manufahi nia leet. 

Nélio Maukinta ‘Lagarto’, ne’ebé uluk eskolta Saudozu Ma’hunu. Imajen Agência TATOLI/Nelson Sousa.

“Tinan barak la’o hamutuk ho Ma’hunu, kuidadu nia hanesan ha’u-nia aman, nunka husik, inimigu ladi’ak mós buka dalan hodi lori sai ba fatin ne’ebé halo planu polítika militár funu la’o ba oin ho barani,’’nia dehan.

Reprezentante Família, Milena da Costa Rangel, agradese ba estadu no parte hotu  nia  prezensa iha momentu defísil  dezde haloot isin saudozu to’o kari ai-funan loron 40 nian. 

Família hosi saudozu Ma’huno. Imajen Agência TATOLI/Nelson Sousa.

Entertantu, partisipa iha prosesu misa no kari ai-funan ne’e  Eis Prezidente Repúbliku, José Ramos Horta, reprezentante órgaun soberania sira, veteranu, reprezentante F-FDTL no PNTL, grupu organizasaun rezisténsia no família.

Notísia relevante: http://www.tatoli.tl/2021/09/24/mahuno-bulerek-karathayano-hakotu-iis-tanba-atakasaun/

Jornalista         : Nelson de Sousa

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here