DSMPPTT realiza konferénsia munisipál iha Viqueque. Imajen Tatoli/ Vitorino Lopes da Costa.

VIQUEQUE, 06 novembru 2021 (TATOLI) — Konsellu Solidariedade ba Estudante no Joven sira iha Timor-Leste (DSMPPTT, sigla indonézia) sábadu ne’e realiza konferénsia munisipál iha Viqueque nune’e reorganiza organizasaun rezisténsia ne’e.

Organizasaun rezisténsia ne’e naran orijinál mak Dewan Solidaritas Mahasiswa Pemuda dan Pelajar Timor-Timur (DSMPPTT) ne’e hala’o  konferénsia nível munisipál ne’e ho tema “Liuhosi konferénsia DSMPTL valoriza espíritu nasionalizmu no hametin demokrasia, pás no dezenvolvimentu nasionál.”

Organizasaun  rezisténsia ne’e harii hosi estudante universitáriu sira iha tinan 1998.  Maibé to’o ukun-aan organizasaun la’o ladún organizadu tanba ne’e hosi konferénsia ne’e hodi re-organiza fila-fali.

Objetivu hosi konferénsia ne’e, atu reorganiza membru DSMPPTT, reajusta estrutura, rekoñesimentu ba membru sira, peskiza hakerek istória no harii kooperativa iha munisípiu to’o postu administrative iha territóriu nasionál.

“Ohin, ami realiza konferénsia ne’e, atu re-organiza no hadi’a estrutura hodi ami bele trasa planu no ami sei envolve membru DSMPTL hari’i kooperativa. Ami hetan fundu hosi Gabinete Sosiedade Sivíl hosi Primeiru-Ministru montante hamutuk rihun $100, hodi ami distribui ba konferénsia reorganizasaun no halo investimentu ba kooperativa,”  Sekretáriu Jerál DSMPTL, Moises da Silva informa ba Agência TATOLI, iha Viqueque.  

Iha fatin hanesan, Vise Xefe Estadu Maiór Jenerál F-FDTL, Majór Jerál Domingos Raul “Falur Rate Laek” husu membru DSMPPTL mantein inisiativa no hametin estrutura organizasaun.

“Organiza malu didi’ak no kria estrutura hodi hatudu ba sosiedade hodi apoiu ba prosesu dezenvolvimentu. Bainhira DSMPTL hamoris ona organizasaun ne’e sira sei sai nasionalizmu ne’ebé di’ak iha Timor-Leste,” Majór Jenerál ne’e fó hanoin.

Enkuantu konferénsia DSMPPTT ne’e realiza kada munisípiu, munisípiu hitu inklui Viqueque halo ona konferénsia no tuir planu sei realiza tán konferénsia iha munisípiu neen.

Partisipa iha konferénsia ne’e, Vise-Xefe Majór Jeneral F-FDTL, Falur Rate Laek, Adiministradór Munisípiu Viqueque Januário Soares ‘Boly’ no membru DSMPTL munisípiu Viqueque hamutuk 50-resin.

Jornalista         :Vitorino Lopes da Costa
Editór               : Evaristo Martins

PUBLISIDADEiklan

HAKEREK NO HATÁN

Please enter your comment!
Please enter your name here